Маладзечанскія бібліятэкі атрымалі кнігі ў падарунак ад чытачоў і выдаўцоў

Жыхары раёна, пісьменнікі, рэдакцыі газет, выдавецтвы краіны, грамадскія арганізацыі падарылі больш за тры тысячы кніг. Гэта мастацкія творы беларускіх і замежных пісьменнікаў, навучальная, даведачная, навукова-папулярная літаратура, выданні для дзяцей. Як правіла, людзі, якія дораць бібліятэкам кнігі, любяць чытаць самі і маюць хатнія бібліятэкі, у якіх сабрана самае дарагое сэрцу.

Цікавыя беларускія выданні атрымала Цэнтральная раённая бібліятэка імя Багдановіча пад час правядзення культурна-асветніцкай акцыі “Шляхамі паэтаў”, прысвечанай юбілеям класікаў беларускай літаратуры, – Янкі Купалы, Якуба Коласа і Максіма Танка. Гэта кнігі вядомага калекцыянера паштовак Уладзіміра Ліхадзедава і галоўнага рэдактара газеты “Звязда” Алеся Карлюкевіча “Знічкі Айчыны: гісторыя Беларусі ў старых паштоўках”, кніга таго ж Алеся Карлюкевіча “Сцежкамі Ігуменшчыны”, кніга вядомага беларускага этнографа Паўла Шпілеўскага “Беларусь у абрадах і казках” і шмат іншых.

Падарункам для чытачоў Турэц-Баярскай сельскай бібліятэкі стаў прыезд 11 верасня кіраўніцтва Беларускага фонда культуры і “Краязнаўчай газеты”. У бібліятэку былі перададзены кнігі, сабраныя ГА “Беларускі фонд культуры”:

- аповесць Уладзіміра Караткевіча “Дзікае паляванне караля Стаха” на беларускай, украінскай, рускай і англійскай мовах,

- тры кнігі Максіма Багдановіча, якія выйшлі да юбілею класіка на беларускай і дзевяці замежных мовах,

- выданні з аўтографамі Генадзя Бураўкіна, Уладзіміра Ліпскага, Навума Гальпяровіча, Алеся Жука, Уладзіміра Гілепа, Сяргея Законнікава, Леаніда Лыча і іншых. Пісьменнік Анатоль Бутэвіч, які прысутнічаў на свяце, падараваў кнігі з уласнай бібліятэкі.

Супрацоўнікі маладзечанскіх бібліятэк удзячныя і выдавецтвам Беларусі, што прынялі ўдзел у акцыі “Падары кнігу бібліятэцы”. Адным з першых далучыўся да яе выдавец Аляксей Вараксін. Падтрымалі ініцыятыву Віктар Хурсік і Зміцер Колас, выдавецтвы “Звезды гор”, “Мон литера”, “Аверсэв”, “Харвест”, “Красико-принт”, “Прокомплекс”, “Зорны верасок”, “Квадрограф”, “Про Христо” і ВА ТАА “Эльсід”, “Кнігазбор”, “Чатыры чвэрці”, “Галіяфы”.

Цэнтральная раённая бібліятэка імя Багдановіча атрымала таксама падарунак ад пасольства Кітая – кнігі і дыскі аб гісторыі, традыцыях, прыродзе Кітая.

Акцыя “Падары кнігу бібліятэцы” будзе доўжыцца да канца года.

Метадыст Маладзечанскай ЦРБ Барыс БРАЦУК для Край.бай