Cвята-конкурс “Разьбы зачараванне” сабрала на Мядзельшчыне майстроў з Маладзечанскага, Астравецкага і іншых раёнаў

Стаўбцоўскі раён на ім прадстаўляў Валерый Чараднічэнка, Чэрвеньскі – Рыгор Судак, Маладзечанскі – Іван Кузмічоў, Астравецкі – Генадзь Саленік.

А вось Мядзельшчына выставіла цэлую каманду ў складзе Генадзя Скурко, Мікалая Свечкарова, Вячаслава Броскі і Юрыя Камандзірчыка, а таксама юных аматараў разьбы па дврэве Максіма Райчонка, Яраслава Пальцава, Сяргея Баранскага, Максіма Цэцэрскага і Віталія Лёткі, – паведамляе 2 чэрвеня сайт Мядзельскага райвыканкама.

Хто стане пераможцам конкурсу, чыя праца будзе выканана з найбольшым майстэрствам? Менавіта гэта пытанне вырашала кампетэнтнае журы ў склад якога ўвайшлі Вольга Хачкова – загадчык аддзела традыцыйнага мастацтва ДУ “Мінскі абласны цэнтр народнай творчасці”, Алена Васіленка – галоўны мастак цэнтра і Ганна Падгол – намеснік начальніка аддзела ідэалагічнай работы, культуры і па справах моладзі Мядзельскага райвыканкама.

Дыпломамі за І месца ў розных намінацыях і каштоўнымі падарункамі ўзнагароджаны ўсе юныя ўдзельнікі конкурсу. Ды і дарослыя не засталіся пакрыўджанымі.

Лаўрэатамі VII рэгіянальнага свята-конкурсу майстроў разьбы па дрэве “Разьбы зачараванне” ў намінацыі “За лепшы твор у галіне дробнай пластыкі” стаў Генадзій Скурко з Мядзельшчыны, “За арганізацыю пераемнасці мастацкіх традыцый разьбы па дрэве” яго зямляк – Мікалай Свечкароў, “За лепшы твор у тэхніцы геаметрычнай разьбы па дрэве” – Вячаслаў Броска, “За зберажэнне традыцый разьбы па дрэве” – Юрый Камандзірчык, якія таксама працуюць на нарачанскай зямлі.

Узнагародамі адзначаны і майстры з іншых раёнаў.

Па матэрыялах сайта Мядзельскага райвыканкама