Шасцігадовы маладзечанец стварае элементы дэкору і ўпрыгожанні з гузікаў
Выхаванец дзіцячага сада №5 Маладзечна Мікіта Герасімюк стаў уладальнікам дыплома абласнога фестывалю даследчых работ «Я – даследчык» сярод дашкольнікаў і малодшых школьнікаў.
Аб гэтым 16 красавіка піша “Маладзечанская газета”.
Нягледзячы на свой узрост, шасцігадовы Мікіта Герасімюк умее прышываць гузікі і навучыў гэтаму сваіх сяброў, якія разам з ім наведваюць яслі-сад №5 Маладзечна.
Таксама пры дапамозе гузікаў хлопчык стварае элементы дэкору, упрыгожанні, масажоры для ног і цацкі.
Нядаўна Мікіта ўразіў журы абласнога фестывалю даследчых работ «Я – даследчык» сярод дашкольнікаў і малодшых школьнікаў, які чацвёрты раз праводзіўся ў сталіцы.
Дзеці прапанавалі больш за 100 распрацовак. Ім дапамагалі педагогі. Мікіта працаваў са сваёй мамай Аксанай Раманаўнай, якая працуе выхавальніцай.
– Мікіта здольны хлопчык, – заўважае яна. – Мне было лёгка працаваць з ім над даследчай работай «Другое жыццё гузіка». Гэта якраз той выпадак, калі як педагог я ішла ўслед за ідэямі свайго выхаванца. Мікіта прыдумаў, як упрыгожыць гузікамі настольную лямпу і фотарамку, зрабіць арыгінальны гальштук і незвычайны гадзіннік – усяго 25 аўтарскіх вырабаў.
Акрамя творчасці, Мікіта захапляецца хакеем, марыць стаць міліцыянерам.
Паводле “Маладзечанскай газеты”
Читайте также
