Маладзечанская дружына скаўтаў адзначыла сваё 20-годдзе (ФОТА)
Дружыне скаўтаў Маладэчына 10 мая споўнілася 20 гадоў. На ўрачысты збор, прысвечаны гэтай даце, сабраліся 80 чалавек: цяперашнія і былыя скаўты, кіраўнікі, сябры, бацькі.
Кіраўнікі маладзечанскіх дружын "Імкненне" і "Нямецкі фальварак" Віталь Млечка і Сяргей Шыман, а таксама аднадумцы Васіль Мунцяну з Мінска, Андрэй Аляхновіч з Крупак і Станіслаў Зубовіч з Заслаўя павіншавалі "Маладэчына" з юбілеем.
Андрэй Аляхновіч з Крупак
Падчас мультымедыйнай прэзентацыі прысутныя ўспомнілі самыя яркія моманты ў гісторыі дружыны. Скаўт-інструктарам, якія прайшлі перападрыхтоўку, уручылі адпаведныя пасведчанні.
Пасведчанне аб перападрыхтоўцы атрымоўвае Віталь Капорын. Уручаюць Валеры Трацяк і Мікалай Рудовіч
Сяргей Шыман, Анастасія Шыман, Дзмітры Бялоў, Ганна Цішко, Уладзіслаў Мацуновіч, Наталля Шырко і іншыя выканалі песні.
На сцэне – начальнік дружыны "Маладэчына" Валеры Трацяк
Ганна Цішко і Сяргей Шыман
Анастасія Шыман
Эдуард Жалубоўскі
Ва ўрачыстай абстаноўцы Дзяніса Аладзіна пасвяцілі ў малодшыя скаўты.
Наталля Шырко і Арцём Кавяза нядаўна сталі скаўтамі
Былі і высокія ўзнагароды. Віцэ-прэзідэнт грамадскай арганізацыі “Беларускі скаўцкі рух” Мікалай Рудовіч уручыў куратару дружыны Барысу Вайцяхоўскаму і яе кіраўніку Валерыю Трацяку скаўцкія ордэны “Бронзавы зубр”. Усяго ў Беларусі такую ўзнагароду маюць восем чалавек.
Ордэн “Бронзавы зубр” уручаюць начальніку дружыны "Маладэчына" Валерыю Трацяку
Затым быў салодкі стол для малодшых, а ветэраны дружыны, самаму старэйшаму з якіх 38 гадоў, адправіліся за горад на скаўцкі пікнік. На традыцыйны 21-ы вясенні злёт "Уша-2013" сабраліся скаўты з Мінска, Смаргоні, Маладзечна, іншых гарадоў Беларусі – больш за 150 чалавек. Ад імя Беларускай скаўцкай арганізацыі юбіляраў павіншаваў першы старшыня савета арганізацыі Ігар Касцевіч.
Першы скаўцкі патруль “Воўк” на чале са скаўт-інструктарам Валерыем Трацяком з’явіўся ў горадзе ў маі 1992 года. Пра гэта Край.бай пісаў раней. Падрабязней – ТУТ. Праз год, у 1993-м, пасвяцілі яшчэ 21 скаўта – і ўтварылася дружына. Ініцыятарам стварэння скаўцкай дружыны быў дырэктар Маладзечанскай беларускай гімназіі Барыс Вайцяхоўскі. Ён і стаў шэф-скаўтам, куратарам арганізацыі.
За 20 гадоў праз “Маладэчына” прайшло больш за 500 кадэтаў (кандыдатаў), 152 з іх былі пасвечаны ў скаўты. Было падрыхтавана 22 скаўт-інструктары, два з іх – Валеры Трацяк і Мікалай Рудовіч – сталі скаўт-майстрамі. Цяпер у дружыне 42 чалавекі на чале са скаўт-майстарам Валерыем Трацяком.
“Скаўцкая методыка дае магчымасць рэалізавацца асобе ў калектыве і не страціць сваёй індывідуальнасці. Аглядаючыся на перажытыя гады, мы можам сказаць, што ўсе сябры дружыны знайшлі сваё месца ў жыцці, сталі добрымі спецыялістамі і грамадзянамі сваёй краіны”, – адзначыў Валеры Трацяк у размове з карэспандэнтам Край.бай.
Святлана ЦІШКО
Фота Віталя МЛЕЧКІ
Читайте также
