Трава, палена і нават бульба – з такіх матэрыялаў зроблены лялькі, выстава якіх наладжана ў Мядзельскім музеі
На выставе «Лялька: абярог, гульні, памяць» іх прадстаўлена каля 120. Гэта вырабы з фондаў клуба фальклорнай і народнай лялькі «Папараць-кветка», што ў Мінску.
Тут ёсць аўтарскія керамічныя лялькі ў традыцыйных беларускіх строях, паведамляе сайт газеты «Нарачанская зара». Іншыя знаёмяць з персанажамі міфалогіі беларусаў: Зюзям, Лёляй, Цёткай, Жыценем… Багата на выставе лялек, сабраных падчас экспедыцый па рэгіёнах краіны.
– Яны – самабытныя і ўнікальныя, – расказвае навуковы супрацоўнік музея Любоў Грыцкевіч. – Увогуле, на выставе можна пазнаёміцца з народнай лялькай, зробленай не толькі з тэкстылю, але і з зусім нечаканых матэрыялаў – пяску, травы, шэрсці жывёл, моху, пілавіння, воску і нават кукурузы.
Сярод іх шмат лялек-абярэгаў.
– Імі не толькі ўпрыгожвалі інтэр’ер ці гулялі дзеці. Яны заўсёды былі вельмі моцнымі памагатымі ў побыце, грамадскім і асабістым жыцці нашых продкаў, – дадае суразмоўца. – Лялькі рабіліся з нагоды народных святаў, у якасці падарункаў або абрадавых сімвалаў для адзначэння сямейных падзей, такіх як вяселле ці нараджэнне дзіцяці, а таксама проста як захавальніцы спакою, здароўя, дастатку, кахання.
Наведваюць выставу і дарослыя, і дзеці. Пазнаёміцца з багаццем лялечнага свету ў мядзельскім музеі можна да 10 снежня.
Читайте также
В Молодечненском районе водителя, который совершил наезд на 9-летнего мальчика, заключили под стражу
