Свята святога Яна Хрысціцеля пройдзе ў Мосары Глыбоцкага раёна 25 чэрвеня
Традыцыйна ў гэты дзень у Мосары адбудуцца ўрачыстасці. У касцёле Святой Ганны з самай раніцы пачнуцца набажэнствы, у культурнай праграме – святкаванне Купалля і канцэрт.
Пра гэта распавяла Край.бай галоўны спецыяліст аддзела ідэалагічнай работы, культуры і па справах моладзі Глыбоцкага райвыканкама Таццяна Мацюшонак.
24 чэрвеня каталікі святкуюць нараджэнне Яна Хрысціцеля. Па каталіцкім календары ў гэты дзень адзначаюць і адно з самых старажытных святаў – Купалле.
Па словах Таццяны Мацюшонак, у Мосар прыедуць святары з суседніх раёнаў, таксама чакаецца візіт біскупа Віцебскай дыяцэзіі Алега Буткевіча.
Культурная праграма з удзелам самадзейных калектываў у гэтым годзе пачнецца ў 19.00. Будуць працаваць выставы вырабаў майстроў раёна і гандлёвыя рады.
Не абыдзецца свята і без распальвання вогнішча, гульняў і забаваў.
Як адзначыла Таццяна Мацюшонак, штогод на свята святога Яна Хрысціцеля ў Мосар прыязджаюць больш за 300 гасцей.
Расклад набажэнстваў у касцёле Святой Ганны ў гонар святога Яна Хрысціцеля
Субота, 25 чэрвеня
10.00 – святая імша на пачатак урачыстасці святога Яна Хрысціцеля
11.00-14.00 – адарацыя Найсвяцейшага Сакраманта (наведванне капліцы святога Юстына), працяг у 16.00-18.00
15.00 – святая імша ў інтэнцыі наведвальнікаў рэліквій святога Юстына і парка
19.00 – святая імша з урачыстасці святога Яна Хрысціцеля (блаславенства агню, працэсія і запальванне вогнішча)
19.00 – пачатак культурнай праграмы
Нядзеля, 26 чэрвеня
12.00 – выстаўленне Найсвяцейшага Сакраманта
13.00 – урачыстая святая імша (працэсія, блаславенства)
Юлія ЛАХВІЧ
Читайте также
