Парафіянка з Глыбокага Марыя Садоўская разам з іншымі вернікамі спявала песню для дзяржсакратара Папы Рымскага
Афіцыйны візіт дзяржаўнага сакратара Папы Францішка кардынала П’етра Параліна ў Беларусь адбыўся па запрашэнні кіраўніцтва Беларусі.
За час свайго знаходжання ў Беларусі іерарх прыняў удзел у сустрэчах на дзяржаўным узроўні, у тым ліку з прэзідэнтам Беларусі Аляксандрам Лукашэнкам, сустрэўся з Патрыяршым Экзархам усяе Беларусі Мітрапалітам Мінскім і Заслаўскім Паўлам, асвяціў першы камень новага будынка Апостальскай Нунцыятуры ў Мінску, паведамляе 20 сакавіка сайт газеты “Веснік Глыбоччыны”.
Сярод мерапрыемстваў, на якіх прысутнічаў дзяржаўны сакратар Папы Францішка, – міждыяцэзіяльнае велікапоснае чуванне моладзі ў мінскім касцёле св. Сымона і Алены, святая Імша з удзелам дзяцей у архікатэдральным касцёле.
Мінулыя выхадныя для глыбоцкай моладзі, якая ў ноч з 14 на 15 сакавіка ўдзельнічала ў міждыяцэзіяльным велікапосным чуванні ў мінскім касцёле святых Сымона і Алены, сталі запамінальнымі. Разам з юнакамі і дзяўчатамі – вернікамі з розных куточкаў Беларусі – яны віталі дзяржаўнага сакратара Папы Францішка кардынала П’етра Параліна.
Удзельніца ўрачыстасці парафіянка Глыбоцкай парафіі Марыя Садоўская падзялілася сваімі ўражаннямі:
– Усё вельмі і вельмі спадабалася. Такога ніколі не было ў маім жыцці! Уявіце, прыязджаў другі чалавек пасля Папы Рымскага – для ўсіх католікаў гэта быў хвалюючы момант. Прыемна ўразіла, што кардынал – чалавек просты, як і Іісус Хрыстос, паказаў прыклад, як неабходна быць добрым, любіць людзей. П’етра Параліна правёў канферэнцыю, адказаў на пытанні, якія хвалявалі беларускую моладзь. А на галоўнае з іх, ці прыедзе ў Беларусь Папа Рымскі, сказаў, што наш народ заслужыў гэтай вялікай падзеі. Прыемна было бачыць, колькі юнакоў і дзяўчат сабралася ў касцёле, што сведчыць пра ўзровень веры ў Беларусі. Здзівіў і той факт, што кардынал цікавіцца беларускай культурай – якраз у першыя хвіліны сустрэчы з моладдзю ён працытаваў вершаваныя радкі Рыгора Барадуліна пра Чырвоны касцёл.
Дарэчы, знаёмства дзяржаўнага сакратара з моладдзю праходзіла ў форме прэзентацый кожнай з дыяцэзій. Марыя Садоўская разам з вернікамі Віцебскай дыяцэзіі спявала песню для самога П’етра Параліна.
Паводле сайта газеты “Веснік Глыбоччыны”
Читайте также
