Лепшыя чытальнікі вершаў з Глыбоцкага раёна паўдзельнічаюць у здымках фільма
Праект “Паэтычная Глыбоччына” прысвечаны 600-годдзю горада. Удзельнічаць у ім могуць мясцовыя паэты, кіраўнікі і работнікі ўстаноў, прадпрыемстваў і арганізацый, школьнікі, дзеці, моладзь Глыбоцкага раёна.
Як расказала Край.бай дырэктар раённага арганізацыйна-метадычнага цэнтра Алена Заяц, праект стартаваў у сакавіку. Яго арганізатарам з’яўляецца аддзел ідэалагічнай работы, культуры і па справах моладзі Глыбоцкага райвыканкама.
Праект складаецца з трох этапаў:
1 этап – выразнае чытанне верша, запіс на відэакамеру;
2 этап – выбар журы лепшых чытальнікаў, мантаж фільма з іх удзелам;
3 этап – дэманстрацыя відэафільма на свяце, прысвечаным 600-годдзю горада, 3 ліпеня 2014 года.
“Удзельнікі выбіраюць вершы мясцовых паэтаў, рыхтуюцца да выразнага чытання альбо вучаць на памяць, затым адбываецца відэаздымка чытання выбранага верша. Мэтамі праекта з’яўляюцца развіццё цікавасці да чытання, да роднай мовы, папулярызацыя твораў мясцовых паэтаў, захаванне нацыянальнай спадчыны, фарміраванне адукаванага грамадства”, – патлумачыла Алена Заяц.
Лепшыя чытальнікі будуць урачыста ўзнагароджаныя дыпломамі і паўдзельнічаюць у стварэнні фільма, які пакажуць на свяце горада 3 ліпеня.
Работы можна накіроўваць да канца мая на адрас: завулак Энгельса, 41а-11.
Яўген ЦЯЛІЦА
Читайте также
