Фрагмент сцяны былой яўрэйскай сінагогі знайшлі ў Глыбокім

Найбольшая верагоднасць, што гэта фрагмент сцяны былой яўрэйскай сінагогі, паведамляе сайт “Весніка Глыбоччыны”. Доказам гэтаму з’яўляецца наступны факт: на гэтым месцы, як сведчаць фотаздымкі 30-ых гадоў мінулага стагоддзя, раней стаяла сінагога.

Па сведчанні польскага даследчыка О. Гедэмана: “Яўрэі, якія жылі ў радзівілаўскай частцы Глыбокага і колькасць якіх паступова павялічвалася, павінны былі мець свой малітоўны дом. На пабудову яго патрабаваўся спецыяльны дазвол каталіцкіх духоўных улад. Такі дазвол ёсць ў ашмянскіх актах 1742 года. … Гэтым пісьмом дазволена яўрэям глыбоцкім у асобным месцы і ў далечыні ад касцёла, на месцы былой (была знішчана пажарам. – аўт.), адну сінагогу пабудаваць. Але яна не павінна быць падобнай на касцёл, гэта значыць, павінна быць без вежаў, з невысокім дахам і не ўзвышацца, каб ні з якога боку не здавалася падобнай на касцёл.”