30 жніўня Мосар на Глыбоччыне адзначыць свой 500-гадовы юбілей
Гасцей свята сустрэнуць у 15.00 на ўездзе ў вёску. Потым святочныя мерапрыемствы працягнуцца на пляцоўцы Мосарскага культурна-дэндралагічнага комплекса.
Існаванне вёскі адзначаецца яшчэ ў Літоўскай метрыцы. У апісанні судовага працэсу паміж Мікалаем Радзівілам і Юрыем Зяновічам у 1514 годзе апошні згадваецца як уладальнік населенага пункта Мосар.
Як паведаміла парталу Край.бай спецыяліст аддзела ідэалагічнай работы, культуры і па справах моладзі Глыбоцкага райвыканкама Таццяна Мацюшонак, 30 жніўня запланавана святочная праграма “Святкуе Мосар юбілей. Красуйся, слаўся і квітней!”.
У гэты дзень будуць ускладзены кветкі да магілы ксяндза Юозаса Булькі, пройдзе святочная імша ў касцёле Святой Ганны, насупраць яго адкрыюць памятны знак, прысвечаны юбілею.
Таксама запланаваны акцыя пасадкі дрэў “Алея да юбілею” і мітынг-рэквіем з удзелам духавенства, старшыні райвыканкама Алега Морхата і мясцовага кіраўніцтва.
Будзе адкрыты новы сацыяльны аб’ект – “Дом самастойнага пражывання для грамадзян пенсійнага ўзросту і інвалідаў II и III груп”.
Завяршыцца юбілей вёскі дыскатэкай і святочным феерверкам.
Анастасія ЖУРАЎСКАЯ, Марына ЖАКАЎКА
Читайте также
