2 мая ў Глыбоцкім раёне цалкам адключаць правадное радыё

Пра гэта Край.бай расказаў рэдактар Глыбоцкага мясцовага радыё Чэслаў Берніковіч.

На змену правадному прыходзіць эфірнае вяшчанне праз ультракароткахвалевыя прыёмнікі. Цяпер правадное радыёвяшчанне – нерэнтабельная паслуга. Састарэлае абсталяванне, якое забяспечвала трансляцыю, мадэрнізуюць.

Па словах Чэслава Берніковіча, перадачы будуць транслявацца на частаце 72,65 МГц ультракароткага дыяпазону ў чацвер з 22.05 да 22.30 і суботу з 11.40 да 12.00 у межах зоны дзеяння Ушацкага рэтранслятара. Таксама іх можна слухаць на сайце Глыбоцкага райвыканкама ў раздзеле “Аўдыё”.

Па ўсіх пытаннях, што датычацца прыёму радыёпраграм рэспубліканскага, абласнога і раённага радыё, трэба звяртацца ў раённы вузел электрасувязі. Падрабязную інфармацыю можна атрымаць па тэлефонах 5-03-41, 2-12-50, 2-14-50, 2-15-50.

Анастасія ЖУРАЎСКАЯ