Па вуліцах Глыбокага 19 мая прайшлася навальніца з ветрам, градам і маланкамі (ФОТА)
Стыхія пакінула пасля сябе паваленыя дрэвы і пашкоджаныя дахі.
Як пішуць Весткі, 19 мая а 19-й гадзіне на горад напаўзлі свінцовыя хмары, пачаўся лівень з градам – велічыня градзін дасягала памераў вішні, наляцеў моцны вецер, дрэвы хінуліся долу, бліскала маланка, грымеў гром. Цягнулася гэта хвілін 20. А пасля развіднела, стала ціха і цёпла.
Дзесьці сарвала дах, дзесьці ўпалі дрэвы. Асфальт спрэс усцелены галінамі дрэваў, лісцем, суквеццямі каштанаў. Вуліцы Леніна і Горкага перакрытыя для руху паваленымі дрэвамі, аўто едуць вакольнымі вуліцамі. У парку Перамогі – буралом, дрэвы ледзьве не пашкодзілі помнік афганцам. Перакуленыя ветрам лаўкі.
На вуліцы Горкага пападала шмат дрэваў. На Копцеўцы суцэльны буралом, пашкоджаныя надмагільныя помнікі. Вялікая 200-гадовая ліпа з колішняга кармеліцкага саду, вывернутая з каранём, падаючы, ушчэнт разнесла частку цаглянай сцяны XVII ст. На двухпавярховым катэджы, што насупраць стадыёна, голыя кроквы – даху няма.
Шмат дзе на дамах прыватнага сектару – сарваныя з дахаў па некалькі шыферын, а на трохпавярховым доме па вуліцы Камуністычнай, 37-А зляцела значная частка шыфернага даху.
У горадзе не дзясятак паваленых дрэў, паўсотні, а той і пад сотню, піша газета.
Пацярпеў сквер Перамогі
Штораз, як ураган у Глыбокім, валяцца вялізныя дрэвы ля пошты
Паваленыя ўраганам дрэвы перакрылі рух на цэнтральных вуліцах горада. Вуліца Горкага
Пасля ўрагану адразу пачалася расчыстка вуліц. Удзельнічалі як жыхары горада, якія маюць адпаведны інструмент, так і камунальнікі
На вуліцы Горкага знесла дах у катэджа
Суцэльны буралом на могілках Копцеўка. Пашкоджаныя надмагільныя помнікі, у тым ліку і помнікі польскім легіянерам, якія загінулі ў 1920 годзе.
Працуе тэхніка на вуліцы Горкага. Прыехалі лесавоз і пагрузчык
Частку шыфернага даху сарвала на доме 37-А па вул. Камуністычнай
Пашкоджаны балкон на доме па вул. Камуністычнай
Разбіраюць завалы па вул. Горкага
Пад упаўшай 200-гадовай ліпай рухнула частка сцяны XVII ст. колішняга кармеліцкага саду
Яшчэ фота можна паглядзець ТУТ.
Паводле Вестак
Читайте также
