Зазірнуць у мінулае паспрабуюць пад час медыявандроўкі па вуліцах Глыбокага

Аб гэтым паведамляе “Веснік Глыбоччыны”. Супрацоўнікі бібліятэкі ўжо распрацавалі цыкл мерапрыемстваў “Глыбокае. Глыбачане”, у межах якога плануецца выпусціць рэкламную прадукцыю пра славутых землякоў, а таксама арганізаваць сустрэчы з пісьменнікамі, выехаць у сельскія бібліятэкі з прэзентацыямі кніг, выдадзеных да Дня пісьменства: «Глыбокае: повязь часоў» і «Глыбокае. Зямля, любімая навечна, дзе Доўгае і Беразвечча», “Там, дзе возера Глыбокае. Глыбоччына літаратурная” і шмат што іншае.

“Глыбокае старажытнае і Глыбокае маладое”. Пад такой назвай, як патлумачыла дырэктар Глыбоцкай ЦРБ Валянціна Спасібёнак, бібліятэкары арганізуюць акцыю, пад час правядзення якой мяркуюць сабраць кнігі, фотаздымкі, пазначаныя часам, запісаць успаміны чытачоў-глыбачан. А потым на аснове сабранага матэрыяла плануецца наладзіць выставу.

Будзе арганізавана таксама і медыявандроўка “Па вуліцах нашага горада”. Гэта будзе яшчэ адна магчымасць зазірнуць у таямнічае мінулае горада, паглядзець на тое, што здаецца нам паўсядзённым і звыклым, па-новаму.

Па матэрыялах “Весніка Глыбоччыны”