У Глыбокім адкрылася выстава работ студэнтаў-мастакоў з віцебскага універсітэта (ФОТА)
У раённым Доме рамёстваў адкрылася выстава “Прыгажосць выратуе свет”. Упершыню на Глыбоччыну “завіталі” дыпломныя, курсавыя і вучэбныя работы студэнтаў мастацка-графічнага факультэта Віцебскага дзяржаўнага ўніверсітэта імя П.М. Машэрава.
На ёй экспануюцца вырабы з саломкі, скуры, воўны, дрэва, жывапісныя палотны, 11 лістапада піша “Веснік Глыбоччыны”.
І рэкламаваў іх, прадстаўляў на ўрачыстым адкрыцці выставы – мастак, творца, чалавек, які вучыць і натхняе студэнтаў на “худграфе” ВДУ (у гэтым годзе развітаўся з 38-м выпускам), выкладчык кафедры дэкаратыўна-прыкладнога мастацтва і тэхнічнай графікі – Анатолій Альхімёнак.
Дарэчы, ён – родам з вёскі Залессе, скончыў там сярэднюю школу, а потым паступіў у тую самую навучальную ўстанову, з якой не расстаецца і па сённяшні дзень, праўда, у свой час тры гады вучыўся ў Ленінградзе. І сваю зацікаўленасць у экспанаванні ў Глыбокім твораў выпускнікоў і студэнтаў ВДУ патлумачыў так:
– У школах патрабуюцца новыя кадры, якія б дасканала валодалі сучаснымі камп’ютарнымі тэхналогіямі. Я, як ваш зямляк, вазьму пад сваё “крыло” вашых таленавітых вучняў. А тут, на выставе, на прыкладзе работ студэнтаў, хаця б толькі іх маленькай частачкі, хай яны ўбачаць, чым могуць займацца ў нас на “худграфе”.
Выставу арганізатары прымеркавалі да 55-гадовага юбілею мастацка-графічнага факультэта і кафедры выяўленчага мастацтва ВДУ імя П.М. Машэрава.
Графіка, жывапіс, тэкстыль, дэкаратыўная пластыка, кераміка, дызайн – творы віцебскіх студэнтаў, розныя па жанрах, відах і тэхніках, убачаць у школах, музеях, у дамах рамёстваў Віцебшчыны.
Паводле “Весніка Глыбоччыны”
Читайте также
