"Мядовы спас" адзначылі ў Глыбокім (фота)
"Мядовы спас" – праваслаўнае свята, якое ў Глыбокім маштабна адзначылі ўпершыню. Яно адбылося на цэнтральнай плошчы горада і сабрала аматараў мёду, пчаляроў і іншых зацікаўленых.
Край.бай публікаваў праграму свята.
Падчас адкрыцця свята старшыня райвыканкама Алег Морхат зазначыў, што на Глыбоччыне ўдалося захаваць пчалярства нават у сяльгасгаспадарках. Зараз там налічваецца каля 2 000 пчоласем’яў. Да таго ж ёсць і шмат прыватнікаў, якія разводзяць пчол, паведамляе Радыё Рацыя.
Найлепшым пчалярам Глыбоччыны на ўрачыстасці ўручылі падзякі за іх шматгадовую працу. Па словах Антона Ясюковіча, які мае стаж працы 25 год і на дадзены момант даглядае 114 пчаліных сем’яў, цяпер праца пчаляра прыносіць больш задавальнення, чым прыбытку:
– Працаваць трэба вельмі шмат, асабліва летам. Практычна няма вольнага часу. Зімой крыху лягчэй, але тады трэба і вуллі рамантаваць, і рамкі, і воск тапіць. У гэтым годзе толькі трэцюю частку ад леташняга мёду адкачалі. Ліпень быў халодны, а ў нас асноўны мёдазбор ідзе, калі цвітуць кветкі.
У межах свята прайшоў мядовы кірмаш, выстава-дэгустацыя мёду, продаж зёлак і прыладаў для пчалярства. А таксама адбыўся канцэрт, падчас якога зладзілі аўкцыён мёду. Атрыманыя ад яго сродкі пойдуць на пабудову праваслаўнага храма Архістратыга Божага Міхаіла, будаўніцтва якога ўжо распачалося ў Глыбокім.
Мядовы спас адзначылі ў Глыбокім
Паводле Радыё Рацыя
Читайте также
