Міжнародная экспедыцыя вывучае ў Глыбокім жыццё габрэяў (ФОТА)
У складзе экспедыцыі 30 навуковых супрацоўнікаў, этнографаў і студэнтаў з ЗША, Украіны, Расіі ды Беларусі. Яны вывучаюць надпісы на габрэйскіх могілках і складаюць іх мапу, дакументуюць артэфакты, запісваюць успаміны старажылаў пра жыццё габрэяў у даваенны час і гады Другой сусветнай вайны ў Глыбокім.
Грамадская арганізацыя "Сэфер" з Масквы наведала Глыбокае. Сябры арганізацыі будуць тыдзень праводзіць экспедыцыю па вывучэнні жыцця глыбоцкіх габрэяў, паведамляе 24 ліпеня Радыё Рацыя.
Па словах кіраўніка групы эпіграфістаў Аляксандры Фішаль, вывучэннем могілак яна займаецца шмат год, таму што гэта важная гістарычная крыніца:
– Калі казаць пра Глыбокае, то тут незвычайныя для Беларусі шрыфты сустракаюцца, незвычайныя, прыгожыя літары. Нягледзячы на тое, што выразаць па граніту, які тут пераважна прысутнічае, цяжка. Цяпер можна сказаць, што гэтыя могілкі насамрэч старыя і вельмі цікавыя. Частка камянёў, якія тут ёсць, – гэта старая частка, яны некранутыя. На ўваходзе напісана, што разбурана фашыстамі. Вось гэтая частка відавочна не была разбурана – гэта мы ўжо дакладна ведаем, бо камяні даволі глыбока сышлі ў зямлю – гэта сведчыць пра тое, што яны не перасоўваліся з моманту ўсталявання.
Па выніках экспедыцыі з'явіцца электронны каталог і выпусцяць брашуру пра жыццё габрэяў у Глыбокім з аналітычным матэрыялам, а таксама картаграфічныя звесткі могілак і пахаванняў.
Паводле Радыё Рацыя
Читайте также
