Гурт “Сваякі” з Пастаўшчыны стаў пераможцам абласнога конкурсу аматарскіх тэатраў
23 сакавіка ў аграгарадку Падсвілле Глыбоцкага раёна адбыўся абласны агляд-конкурс маладзёжных аматарскіх тэатраў сельскіх устаноў культуры “Тэатральныя далягляды вёскі”.
Як піша “Пастаўскі край”, конкурс традыцыйна праводзіцца раз у два гады. Дарэчы, тут збіраюцца сельскія тэатральныя калектывы вобласці ўжо ў трэці раз. Гэта невыпадкова, бо пры ўстанове дзейнічаюць аж два тэатры — народны маладзёжны тэатр мініяцюр “Ідучыя на смех” і ўзорны дзіцячы тэатр. Апошні, ярка ўвасобіўшы на сцэне п’есу-казку С. Кавалёва “Піліпка і Ведзьма”, стаў пераможцам сярод дзіцячых калектываў.
Пастаўчане прывезлі на суд аматараў і прафесіяналаў тэатральнага мастацтва камедыю В. Ткачова “Курорт для зяця” у пастаноўцы тэатральнага калектыву “Пульс” Гуцкага СКЦ (рэжысёр Тамара Маслоўская), спектакль паводле п’ес А. Макаёнка “Добра, што добра канчаецца”, увасоблены тэатральным калектывам “Сваякі” Камайскага СДК (рэжысёр Галіна Бразюль) і забаўляльную праграму “А ў нас Саракі” народнага клуба “Юнчанка” Юнькаўскага СДК (кіраўнік Ніна Малец).
Поўны гумару, з яркімі камедыйнымі персанажамі, сярод якіх прыцягвалі асаблівую ўвагу героі Аляксея Кухальскага і Уладзіміра Балта, спектакль Гуцкага СКЦ быў адзначаны дыпломам за ўвасабленне твораў сучаснай беларускай драматургіі.
“Юнчанка” атрымала ўзнагароду за 3-е месца ў выставе “Смачны панадворак” (на конкурс на гэты раз запрашаліся і клубы нацыянальнай кухні).
Аматарскі тэатральны гурт “Сваякі” вясковых артыстаў з Камай (Пастаўскі раён) стаў пераможцам (1-е месца) у асноўнай намінацыі агляду-конкурсу “Драматычны спектакль”. Дыплом за лепшую жаночую ролю атрымала таксама ўдзельніца гэтага калектыву Вікторыя Паўлава.
Па матэрыялах “Пастаўскага краю”
Читайте также
