Гульнёва-забаўляльныя, спартыўныя і творчыя пляцоўкі будуць працаваць у Глыбокім 1 чэрвеня
1 чэрвеня на Цэнтральнай плошчы горада адбудзецца свята, прысвечанае Міжнароднаму дню абароны дзяцей. На працягу пяці гадзін, з 10.00 да 15.00, цэнтр горада будзе аддадзены маленькім і юным жыхарам Глыбоччыны, іх творчасці, забавам і адпачынку.
Свята арганізуюць аддзел адукацыі, спорту і турызму райвыканкама і Цэнтр дзяцей і моладзі, паведамляе сайт газеты "Веснік Глыбоччыны".
Увесь гэты час тут будуць працаваць выставы дэкаратыўна-прыкладнога мастацтва “Дзяцінства. Фантазія. Творчасць”, пляцоўка юнага мастака “Я малюю лета, я малюю сонца”, творчая пляцоўка, на якой ўсе жадаючыя змогуць паспаборнічаць у конкурсе на самую вялікую мыльную бурбалку. Педагогі Цэнтра дзяцей і моладзі правядуць для жадаючых майстар-класы. Для аматараў рухомых гульняў будуць працаваць дзіцячыя атракцыёны.
Урачыстае адкрыццё свята і канцэртная праграма, у якой прымуць удзел выхаванцы цэнтра і вучні гарадскіх школ, пачнецца ў 11 гадзін. У рамках праграмы пройдзе флэшмоб “Добры дзень, сонечнае лета”.
З 13.00 да 15.00 на Цэнтральнай плошчы будуць разгорнутыя гульнёва-забаўляльныя і спартыўныя пляцоўкі “Дзяцінства, наперад, лета кліча!”. Хлопчыкі і дзяўчынкі змогуць паўдзельнічаць у шашачна-шахматных баталіях, праверыць сябе на хуткасць і спрыт.
Па матэрыялах сайта газеты "Веснік Глыбоччыны"
Читайте также
