Відэаролік з Параф'янава Докшыцкага раёна «Чытаем Багдановіча разам» заняў ІІІ месца на абласным конкурсе (відэа)

Гэтая работа была прызнаная лепшай падчас правядзення раённага конкурсу «Святло паэзіі Максіма Багдановіча», у якім прынялі ўдзел амаль усе бібліятэкі раёна. Сярод тэматычных мерапрыемстваў, прысвечаных юбілею класіка беларускай літаратуры, цікавымі былі літаратурны вечар «Дзіўная зорка Максіма Багдановіча», які адбыўся ў Парплішчанскай бібліятэцы, сумесная праграма Несцераўшчынскага і Тумілавіцкага бібліятэк-клубаў «Незабыўны Максім Багдановіч», паэтычна-музычная гасцёўня «Нязгасная зорка паэта» Глінскай бібліятэкі, піша 19 снежня сайт газеты «Родныя вытокі».

Загадчыца Параф’янаўскай бібліятэкі Рэгіна Красоўская творча падышла да распрацоўкі мерапрыемства да конкурсу і разам з вучнямі Параф’янаўскай школы падрыхтавала паэтычна-музычную гасцёўню «І застаўся ты ў нашых думках». Дзеці выконвалі свае любімыя творы Максіма Багдановіча. Адзінаццацікласнік Яўген Каросцік чытаў «Маладыя гады», трэцякласніца Марыя Красоўская – «Упалі з грудзей Пана Бога…». Васьмікласніца Настасся Паўловіч выбрала для дэкламацыі верш «Слуцкія ткачыхі». Меладычныя радкі твора «Па-над белым пухам вішняў» гучалі ў выкананні метадыста ЦБС Аксаны Шворан. Гімн Багдановіча, знакаміты твор любоўнай лірыкі паэта верш «Раманс» прачытала малады спецыяліст ЦБС Вікторыя Ражкова.

Відэазапіс паэтычна-музычнай гасцёўні Параф’янаўскай бібліятэкі і прадставіў Докшыцкі раён на абласным конкурсе, вынікі якога былі падведзены на тэматычным мерапрыемстве, што прайшло ў Віцебскай абласной бібліятэцы імя Леніна.