На Браслаўшчыне выбіраюць лепшага настаўніка
З 8 па 31 студзеня праводзіцца раённы этап рэспубліканскага конкурсу прафесійнага майстэрства педагагічных работнікаў “Настаўнік года Рэспублікі Беларусь – 2014”.
Конкурс адбываецца на базе гарадскіх школ, гімназіі і ясляў-сада №3. Сёлета ён праходзіць ўжо дзявяты раз, а яго гісторыя бярэ свой пачатак з 1990 года, піша “Браслаўская звязда”.
Дарэчы, першае такое “спаборніцтва” праводзілася ў кафэ, дзе цяпер знаходзіцца “Сузор’е”, і першым пераможцам тады стаў настаўнік гісторыі з СШ №1 Іван Храпан.
У гэтым годзе ў конкурсе прымаюць удзел чатырнаццаць педагагічных работнікаў (11 настаўнікаў-прадметнікаў і 3 выхавальнікі) з дзвюх устаноў дашкольнай адукацыі і 10 агульнай сярэдняй.
Конкурсныя мерапрыемствы ўключаюць у сябе псіхолага-педагагічнае тэсціраванне, пытанні па тэорыі і методыцы выкладання прадмета, педагогіцы і псіхалогіі, мультымедыйную і публічную самапрэзентацыю, адкрыты ўрок у незнаёмым класе, завочнае пісьмовае і публічнае прадстаўленне вопыту педагагічнай дзейнасці па зададзенай тэме.
Асаблівасць дадзенага конкурсу ў тым, што на ўсіх этапах ён праводзіцца па 7 намінацыях: “Фізіка, астраномія, матэматыка, інфарматыка”, “Замежная мова”, “Руская, беларуская мова і літаратура”, “Пачатковыя класы”, “Музыка, выяўленчае мастацтва, працоўнае навучанне, чарчэнне, фізкультура і здароўе, дапрызыўная падрыхтоўка”, “Гісторыя, грамадазнаўства, геаграфія, хімія, біялогія”, “Выхавальнік дашкольнай адукацыі”.
Сіла розуму і тэхналагічнасць сваёй дзейнасці, лідарскія якасці, уменне прэзентаваць свой вопыт і ідэі, мабілізацыя інтэлектуальных, духоўных і маральных сіл – вось тыя якасці, якія вызначаць паспяховасць выступлення канкурсантаў у гэтым спаборніцтве.
Сем пераможцаў у намінацыях, якіх вызначыць кампетэнтнае журы, узнагародзяць 1 лютага. Іх і накіруюць на абласны этап.
Паводле “Браслаўскай звязды”
Читайте также
