Мастакі з усёй Беларусі з'ехаліся на пленэр у пасёлак Друя, што на Браслаўшчыне (фота)
Пленэр мастакоў з усёй Беларусі праходзіў у ліпені на базе манастыра пры касцёле Найсвяцейшай Троіцы ў Друі.
Ініцыятарам яго правядзення выступіў мясцовы ксёндз Сяргей Сурыновіч. Сёлета пленэр праходзіў другі раз і сабраў значна больш удзельнікаў, паведамляе 4 жніўня сайт газеты “Браслаўская звязда”.
У гэтым годзе на ўдзел у ім былі пададзены 82 заяўкі, але адабранымі аказаліся толькі 32 мастакі. Сярод удзельнікаў – мэтры беларускага мастацтва, чые работы захоўваюцца ў розных музеях Беларусі і замежжа: сімвалісты Марта Шматава і Алесь Пушкін, мультыплікатар і акварэліст Дзмітрый Сурыновіч, “нумар адзін” у беларускім авангардзе Вольга Сазыкіна і пачынаючыя мастакі, будучыя зоркі жывапісу.
– Выбраць самых лепшых для ўдзелу ў пленэры было складана, дапамагала рабіць адбор мастачка з Мінска, іканапісец Вольга Куваева, – расказаў ксёндз Сяргей Сурыновіч. – У Друю прыехалі творцы з Мінска, Брэста, Магілёва.
На працягу тыдня Друя і яе наваколлі ўяўлялі сабой адну вялікую мастацкую майстэрню, у розных куточках якой удзень мастакі тварылі, а вечарам збіраліся разам і абмяркоўвалі свае работы. Падчас пленэру было створана больш за сотню карцін рознага накірунку сучаснага жывапісу: ад авангардызму і сімвалізму да рэалізму. Кожны творца па-свойму ўбачыў Друю і яе вулачкі, пейзажы, касцёл, людзей.
Так, мастачка Марта Шматава прадставіла Друю ў вобразе жанчыны з сінімі косамі і чырвонымі каралямі. Як патлумачыла аўтар, косы – рэкі Дзвіна і Друйка, а каралі – кроплі крыві, якая пралілася падчас Вялікай Айчыннай вайны. Такое параўнанне прыйшло, па прызнанні Марты Шматавай, калі яна знаходзілася на мосце і глядзела ў Друйку, водарасці якой нагадалі валасы жанчыны. Менавіта гэтую карціну многія назвалі сімвалам пленэру.
– Шчыра кажучы, я ўпершыню на пленэры, – прызналася мастачка. – Пішацца мне тут цудоўна, спакойна. Пасля працы ёсць добрая магчымасць пагаварыць з калегамі пра мастацтва, абмеркаваць творы.
– Друя зачаравала сваёй аўрай, – падзялілася ўражаннямі Вольга Сазыкіна. – Тут на кожным кроку датыкаешся да гісторыі – вельмі цікавае мястэчка. Нас гасцінна прынялі.
Душэўную і гасцінную атмасферу, якая панавала ў Друі, адзначалі ўсе ўдзельнікі пленэру. Завяршыўся ён адкрыццём вернісажу, на якім былі прадстаўлены ўсе работы мастакоў. Як і ў мінулым годзе, кожны з іх пакінуў па некалькі карцін у Друі для мастацкай галерэі, адкрыць якую марыць гаспадар пленэру ксёндз Сяргей Сурыновіч.
Па матэрыялах сайта газеты “Браслаўская звязда”
Фота з сайта braslav-star.by
Читайте также
