Сімвалам Браслава зробяць рыбака
Конкурс на лепшы эскіз скульптурнай кампазіцыі – сімвала Браслаўшчыны, аб’яўлены аддзелам ідэалагічнай работы, культуры і па справах моладзі, завяршыўся.
Браслаўчанам прапанавалася дасылаць у райвыканкам уласныя праекты скульптур, якія б адлюстроўвалі прыродныя ці гістарычныя асаблівасці Браслаўшчыны, паведамляе “Браслаўская звязда”.
Як паведамляе сайт, людзі ўдзельнічалі ў конкурсе не надта актыўна. Тым не менш, пэўныя прапановы былі, і камісія падвяла вынікі. Хоць пераможца і не быў вызначаны, адзін з праектаў усё ж узялі за аснову для будучай скульптуры.
Браслаўшчына – край азёр, а значыць, і рыбалкі. Таму сімвалам горада і раёна стане рыбалоў. Па заказе аддзела архітэктуры і будаўніцтва райвыканкама макет будучай скульптуры вырабіў прафесійны скульптар з Віцебска Іван Казак, работы якога ўпрыгожваюць многія гарады, у тым ліку і далёкага замежжа.
Пакуль пластылінавы рыбак уяўляе сабой каларытнага мужчыну ў капелюшы. У правай руцэ ён трымае вуду, у левай – злоўленага шчупака. Пад нагамі рыбалова сядзіць кот, які таксама гатовы паласавацца здабычай. Хутчэй за ўсё, макет будзе дапрацаваны, аднак агульная ідэя застанецца нязменнай.
Што датычыцца тэрмінаў, то пры наяўнасці сродкаў і канкрэтных прапаноў скульптуру ўсталююць у гэтым годзе.
Цяпер жа трэба вызначыць, дзе будзе размяшчацца будучы сімвал. З такім пытаннем райвыканкам зноў звяртаецца да браслаўчан. Свае прапановы наконт месца можна выказваць па тэлефоне 3-51-64 аддзела ідэалагічнай работы, культуры і па справах моладзі.
Паводле “Браслаўскай звязды”
Читайте также
