“Вяселле” з падарункамі і бойкай. Народны тэатр Браслаўскага РЦК сабраў гледачоў на новую камедыю
Народны тэатр Браслаўскага раённага Цэнтра культуры запрасіў сваіх прыхільнікаў на прэм’еру камедыі “Вяселле” па п’есе Міхаіла Зошчанкі. Гараджане прыйшлі падтрымаць і ацаніць намаганні сваіх родных, сяброў, калег, бо ролі ў п’есе ігралі не прафесіяналы, а аматары тэатральнага мастацтва.
Рэжысёр спектакля Яўген Набееў і самадзейныя артысты народнага тэатра перанеслі гледачоў у 20 – 30-я гады мінулага стагоддзя, паведамляе 15 лістапада сайт газеты «Браслаўская звязда».
У цэнтры ўвагі п’есы – дом, дзе ідзе падрыхтоўка да святкавання вяселля: маці нявесты рыхтуе святочны стол, бацька ўжо нецвярозы, госці ў чаканні маладых, якіх усё няма. Асноўнае дзеянне разгортваецца, калі яны паасобку вяртаюцца з ЗАГСа і высвятляецца, што жаніх не памятае, як выглядае нявеста, бо ні разу не бачыў яе без верхняга адзення. З-за гэтай акалічнасці ён пастаянна трапляе ў розныя камічныя сітуацыі.
Усяго ў спектаклі былі задзейнічаны каля 20 браслаўчан – гэта адна з самых вялікіх па колькасці занятых людзей пастановак апошняга часу.
Асноўны сюжэт спектакля дапоўнены танцавальнымі замалёўкамі. Увогуле ў гэты вечар на сцэне было ўсё, як на сапраўдным вяселлі: падарункі і віншаванні ад гасцей, конкурсы, танцы і нават бойка.
Нашли ошибку в тексте? Выделите ее и нажмите Ctrl + Enter
Читайте также
