Выставу браслаўчанкі Наталлі Парахневіч адкрылі ў Латвіі (ФОТА)
20 студзеня ў Краслаўскім гістарычным і мастацкім музеі адбылося адкрыццё выставы кіраўніка клуба народных майстроў і самадзейных мастакоў “Ля возера” Наталлі Парахневіч “Колеры натхнення”.
Край.бай анансаваў гэтую падзею. З дэкаратыўнымі пано гэтай выставы браслаўчане і госці горада маглі пазнаёміцца яшчэ восенню мінулага года.
Як адзначыла дырэктар Браслаўскага аб’яднання музеяў Надзея Дударонак, гэта выстава з’яўляецца першай міжнароднай выставай у Краслаўскім музеі. Дырэктар установы Вальдэмар Гекіш паведаміў, што дагэтуль тут выстаўляліся толькі творы мастакоў Латгаліі.
Па словах Надзеі Дударонак, ужо на адкрыцці стала відавочна, што творчасць Наталлі Парахневіч закранула краслаўцаў непаўторнымі сюжэтамі і шматкаляровасцю. Высокую ацэнку работам Наталлі далі фотамастакі, мастак Андрэй Гаргоц, а словы ўдзячнасці выказалі прадстаўнікі гарадской думы, члены беларускага культурнага таварыства ў Краславе “Вясёлка”.
Надзея Дударонак падкрэсліла: нягледзячы на цяжкасці, звязаныя з перасячэннем мяжы, музей будзе працягваць супрацоўніцтва з установамі культуры замежжа.
Па матэрыялах, прадастаўленых Край.бай дырэктарам Браслаўскага аб’яднання музеяў Надзеяй ДУДАРОНАК
Фота прадастаўлены Край.бай Надзеяй ДУДАРОНАК
Читайте также
