Выстаўка жывапісу мастака Фёдара Ястраба будзе працаваць у Браславе да 30 сакавіка (ФОТА)
6 лютага ў музеі традыцыйнай культуры адкрылася выстаўка жывапісу мастака Фёдара Ястраба. Ён пайшоў з жыцця ў 2014 годзе, але пакінуў пасля сябе багатую творчую спадчыну.
Напрыканцы мінулага года гэтую выстаўку ўрачыста адкрывалі ў Нацыянальнай бібліятэцы Беларусі. Дзякуючы намаганням супрацоўнікаў Браслаўскага аб’яднання музеяў родныя мастака прывезлі яе ў Браслаў. Сімвалічна, што браслаўская прэзентацыя супала з днём нараджэння творцы, піша сайт газеты “Браслаўская звязда”.
Фёдар Ястраб родам з Віцебшчыны. Нарадзіўся ў вёсцы Станіслаўцы Глыбоцкага раёна (цяпер Докшыцкі). Маляваць пачаў з дзяцінства і адразу было зразумела, што ў яго мастацкі талент.
Карціны Ф. Ястраба цяпер захоўваюцца ў Дзяржаўным мастацкім музеі г. Сочы, Мастацкай галерэі г. Унеча (Расія), Нацыянальным музеі гісторыі і культуры, Музеі сучаснага мастацтва (Беларусь), галерэях “Ціссо” (Францыя) і “Кляй-Груве” (Бельгія), прыватных замежных калекцыях і культурных цэнтрах.
Карціны сябра Беларускага саюза мастакоў, Міжнароднай гільдыі жывапісцаў, мастака, галерыста, паэта, аўтара і прадзюсера звыш 80 міжнародных праектаў, удзельніка больш чым 120 нацыянальных і замежных выставак прывезлі ў Браслаў яго жонка Арына і сын Віктар. Дзякуючы ім у браслаўчан з’явілася ўнікальная магчымасць пазнаёміцца з творчасцю мастака. У яго карціны трэба ўглядацца, удумвацца і тады атрымаецца ўбачыць задуму аўтара. Яны вельмі яркія, экспрэсіўныя, неардынарныя.
Арына Ястраб расказвае пра творчасць мужа
– Мне вельмі прыемна сёння знаходзіцца ў вашым акружэнні, адчуваць вашу цікавасць да Фёдара, – адзначыла падчас адкрыцця выстаўкі Арына Ястраб. – У апошнія гады жыцця Фёдар пачаў пісаць санеты пра Радзіму, каханне, роздумы на розныя тэмы. За 2 гады іх было напісана амаль дзве тысячы. Так праявілася яшчэ адна грань яго творчасці. І вось нядаўна быў надрукаваны першы том санетаў “Абяцанне сноў”, рыхтуецца яшчэ чатыры.
Пачуць санеты Фёдара Ястраба наведвальнікі мерапрыемства змаглі ў выкананні гімназістаў, якія пранізліва і трапятліва вымаўлялі кожны радок, а музычна выстаўку абрамілі выкладчыкі Дзіцячай школы мастацтваў Альберт Бялусь і Таццяна Саковіч.
На прэзентацыі прысутнічалі начальнікі аддзелаў ідэалагічнай работы, культуры і справах моладзі Браслаўскага і Глыбоцкага райвыканкамаў Антаніна Абалевіч і Таццяна Тарасевіч, сябры Віцебскай суполкі саюза мастакоў, госці з суседніх раёнаў.
Выстава работ мастака будзе дэманстравацца да 30 сакавіка, пасля, магчыма, адправіцца ў суседнія раёны, і на “Славянскі базар” у Віцебск.
Паводле сайта газеты “Браслаўская звязда”
Фота з сайта газеты “Браслаўская звязда”
Читайте также
