Самадзейныя калектывы Браслаўшчыны паказалі сваю творчасць (ФОТА)

Як паведамляе 11 лютага “Браслаўская звязда”, прысвячаліся яны 70-годдзю вызвалення Беларусі ад нямецка-фашысцкіх захопнікаў.

Многія падрыхтавалі традыцыйныя нацыянальныя абрады – “Калядкі”, “Радзіны”, “Багач”, “Тыдзень русалак”. Супрацоўнікі Опсаўскага цэнтра літаратуры і адпачынку прадставілі на суд гледачоў і камісіі абрад “Вяселле”. Пасля гэтага абраду работнікі Гірэйшанскага клуба паказалі “Радзіны”.

Пад назвай “Спяваю для цябе, Беларусь!” прайшоў таксама справаздачны канцэрт Відзаўскага ДК. Відзаўчане парадавалі выступленнем сваіх дзіцячых танцавальных калектываў, піша газета.

Песнямі парадавалі прысутных маладыя салісты ўзорнай студыі эстраднай песні “Фартуна” Сабіна Шчэціна, Дзіяна Баган, Злата Адамовіч, Настасся Кандрацьева, а таксама выкладчык Відзаўскай дзіцячай школы мастацтваў Канстанцін Багушэвіч.

Сюрпрызам стала выступленне зямлячкі, лаўрэата многіх міжнародных песенных конкурсаў, стыпендыяткі спэцыяльнага фонда Прэзідэнта Рэспублікі Беларусь Яны Павініч.

Парадаваў і народны ансамбль народнай песні “Відзаўчанка”, паведамляе “Браслаўская звязда”.

Пасля відзаўчан сваю канцэртную праграму паказалі і самадзейныя артысты з Казян. У ёй свае здольнасці раскрылі юныя Юля Карнышова, Дзіяна Пупіна. А таксама выступіла жаночая вакальная група ААТ “Новая Гвардыя”.

Арыгінальным па пастаноўцы і падыходзе атрымаўся агляд мастацкай самадзейнасці ў Ахрэмаўскім цэнтры нацыянальнай культуры. Усе, хто прыйшоў на свята, маглі напачатку азнаёміцца з работамі майстрыхі Марыі Цясюль, якая прадставіла вышываныя рэчы на рэлігійную тэму, і з работамі з бісеру Наталлі Пяткун.

Сама ж канцэртная праграма была цалкам прысвечана ваеннай тэме. У ёй прынялі ўдзел салісты з гуртка вакалістаў, які працуе пры цэнтры, Каця Арцімовіч і Паліна Свікліс, дарослыя выканаўцы Леанід Лаўрыновіч, Таццяна Крот, Міхаіл Героеў, Мікалай Красоўскі. У гэты вечар упершыню прагучала песня на словы і музыку Леаніда Лаўрыновіча “Браслаўшчына”. Дарэчы, яе дэбют адбыўся на абласным свяце-конкурсе “На зямлі святой Сафіі” у Полацку. Песня была адзначана двума дыпломамі.

Прайшла сустрэча гледачоў з народным ансамблем беларускай песні “Сябрына”. У калектыве з’явіўся новы саліст Аляксандр Лявончанка, з якім многія песні загучалі па-новаму.

На аглядзе ў Ахрэмаўцах прысутнічала намеснік старшыні райвыканкама Іна Лысенка, якая дала высокую ацэнку выступленню самадзейных артыстаў.

На ўсіх канцэртах прысутнічалі старшыні сельскіх Саветаў дэпутатаў.

Лепшыя калектывы прымуць удзел ва ўрачыстым мерапрыемстве, якое будзе прысвечана падвядзенню вынікаў спаборніцтва сярод прадпрыемстваў, арганізацый і ўстаноў народна-гаспадарчага комплексу за 2013 год.

Паводле “Браслаўскай звязды”