На турніры побытавых беларускіх танцаў, што прайшоў у Браславе, польку танчылі больш за 80 чалавек
Турнір побытавых беларускіх танцаў у межах Міжнароднага свята традыцыйнай культуры “Браслаўскія зарніцы”, што прайшло 28 мая ў Браславе, сабраў больш за 80 удзельнікаў з Лепеля, Шуміліна, Гарадка, Лёзна, Сянно, Чашнікаў, Мёр, Глыбокага, Дуброўна, Пастаў, Ушачаў, Полацка, Віцебска і, вядома, Браслава.
Пачаўся ён з добра вядомай і любімай беларускай полькі, паведамляе сайт газеты “Браслаўская звязда”.
Удзельнікаў падзялілі на тры ўзроставыя катэгорыі. Пасля чарговага туру і падліку балаў журы частка пар адсейвалася. І з кожным разам усё цікавей было назіраць, хто ж пройдзе далей.
На працягу некалькіх гадзін кожная пара сваім рухам, паваротам, прытупам і нават усмешкай даказвала, што яна лепшыя. Аднак пераможцам стала і атрымала Гран-пры турніру ў намінацыі “Адметны мясцовы танец” пара з Лёзна.
Асобна былі вызначаны пераможцы і прызёры ў кожнай узроставай групе, а ўсе танцавальныя пары атрымалі дыпломы ўдзельнікаў турніру побытавых беларускіх танцаў.
Добра выступілі і браслаўчане. Абедзве пары выйшлі ў фінал, аднак Дзмітрыю Мачульскаму і Алене Пяткун крыху не хапіла балаў да прызавых месцаў. А вось Аляксей Ягоранкаў і Ала Галіна сталі трэцімі ў сваёй узроставай групе.
Па матэрыялах сайта газеты “Браслаўская звязда”
Читайте также
