На Браслаўшчыне ў Ахрэмаўскай музычнай школе прайшоў выпускны (ФОТА)
У Ахрэмаўскай музычнай школе, якая цяпер з’яўляецца філіялам Браслаўскай дзіцячай школы мастацтваў, ігры на цымбалах, скрыпцы, фартэпіяна і баяне вучацца 29 юных жыхароў аграгарадка.
Як піша 4 чэрвеня “Браслаўская звязда”, школа была адкрыта ў 1986 годзе. Трэці год калектыў узначальвае Таццяна Саковіч, якая, дарэчы, сама была выпускніцай першага выпуску школы.
Сёлета апошнія акорды прагучалі ў адрас шасці выпускніц – Алесі Багдановіч і Карыны Шульі (цымбалы), Дар’і Сцепавой і Веранікі Жойдзь (баян), Ангеліны Скірмант і Наталлі Качаргіной (фартэпіяна). З гэтай нагоды для іх арганізавалі ўрачыстае мерапрыемства, на якое прыйшлі іх бацькі, знаёмыя, сябры.
Дзяўчаты, якія хто пяць, хто сем гадоў авалодваў сакрэтамі ігры на музычных інструментах, у той вечар былі ў цэнтры ўвагі. Загадчыца філіяла Таццяна Саковіч уручыла ім пасведчанні, граматы, атрымалі яны і букеты бэзу. Выпускніцы прадэманстравалі прысутным сваё майстэрства. Некаторыя з іх неаднойчы выступалі і на раённай сцэне.
Прысутнічала на выпускным вечары і старшыня Ахрэмавецкага сельскага Савета Дзіяна Тарун. Яна прызналася, што атрымала сапраўднае задавальненне ад ігры дзяўчат, выказала цёплыя словы ўдзячнасці ў адрас тых, хто дапамагаў ім расці як выканаўцам.
Ад імя бацькоў выкладчыкам дзякавала Галіна Качаргіна. І самі выпускніцы звярнуліся да настаўнікаў і бацькоў са словамі падзякі і прысвяцілі ім свае лепшыя мелодыі.
Да гэтай падзеі быў прымеркаваны справаздачны канцэрт цяперашніх выхаванцаў школы, якія таксама паказалі свае лепшыя нумары. Амаль на працягу дзвюх гадзін гучала музыка і спевы юных талентаў аграгарадка Ахрэмаўцы.
Паводле “Браслаўскай звязды”
Читайте также
