13 жніўня ў Браславе адкрыецца выстава, прымеркаваная да 950-гадовага юбілея горада
Выстава "Дзесяць стагоддзяў гісторыі Браслава" будзе працаваць да 15 лістапада.
Паводле старонкі УКантакце «Музеі Браслава», экспанаты акцэнтуюць увагу на калекцыі прадметаў з археалагічных раскопак на старажытным гарадзішчы Замкавая Гара.
Раздзелы выставы змяшчаюць матэрыялы пра дзеячаў, якія мелі дачыненне да мінулага горада, знаёмяць з этнічным і канфесійным складам насельніцтва. Экспазіцыя напоўнена ілюстрацыямі, фотаздымкамі, адлюстраваннямі Браслава на гістарычных картах і планах, паштоўках, дзе паўстаюць віды вулачак, асобных пабудоў, Замкавай гары.
Браслаўшчына будзе паказана і ў працах мастакоў. Наведвальнікі ўбачаць партрэты Аляксандра Ягелончыка, Станіслава Нарбута, Отана Гедэмана, рэпрадукцыі з замалёвак Напалеона Орды і Дзмітрыя Струкава, серыю малюнкаў Валерыя Зінкевіча "Гісторыя Браслава".
Адкрыццё выставы 13 жніўня ў 14.00 ў Браслаўскім гісторыка-краязнаўчым музеі. Выстава будзе дзейнічаць да 15 лістапада.
Паводле старонкі УКантакце «Музеі Браслава»
Читайте также
