Тыдзень лесу - 2013 стартаваў у Браслаўскім раёне
Сёлета ва ўсіх арганізацыях Беларусі, якія вядуць лясную гаспадарку, дабрачынная акцыя “Тыдзень лесу” пройдзе з 13 па 20 красавіка.
Як паведамляе “Браслаўская звязда”, акцыя прысвечана 130-годдзю стварэння мяча Колесава, спецыяльнай лапаткі для пасадкі саджанцаў лясных культур.
Акцыя праводзіцца Міністэрствам лясной гаспадаркі з 2007 года. З той пары ў ёй прынялі ўдзел больш за 250 тысяч чалавек. Яна дае магчымасць людзям бліжэй пазнаёміцца з лясной гаспадаркай, даведацца, як ствараюцца і захоўваюцца нашы лясы, а таксама ўнесці непасрэдны ўклад у памнажэнне лясных багаццяў краіны.
Так, у мінулым годзе ў Браслаўскім раёне традыцыйнымі ўдзельнікамі акцыі сталі вучні Чэрнеўскай, Мяжанскай, Кансталінскай школ, якія на роўных з вопытнымі лесаводамі закладвалі новыя лясы. У добраўпарадкаванні тэрыторыі, ачыстцы лесу ад смецця і навядзенні парадку ў парку “Бяльмонты” прынялі ўдзел вучні Ахрэмаўскай школы.
Навуковым аддзелам нацпарка для вучняў гарадскіх школ былі праведзены лекцыі на лясную тэматыку, а таксама экскурсіі на пляцоўку для феналагічных даследаванняў.
Арганізацыі раёна таксама не засталіся ў баку: калектыў дзіцячага сада №3 правёў добраўпарадкаванне навакольнай тэрыторыі, а Браслаўская МРІ АЖ і РС, ТБЗ “Браслаўскі” унеслі ўклад у стварэнне новых лесапасадак у Іодскім лясніцтве.
Па традыцыі прыняць удзел у акцыі запрашаюцца ўсе жадаючыя, якія сумесна з лесаводамі НП “Браслаўскія азёры” могуць стварыць памятныя пасадкі лясных ці ландшафтных культур, алей ці сквераў, навесці парадак у лесе, добраўпарадкаваць месцы адпачынку.
Па матэрыялах “Браслаўскай звязды”
Читайте также
