Новы касцёл асвяцілі ў п. Беразінскае на Маладзечаншчыне 31 жніўня (ФОТА)
Святочную імшу цэлебраваў мітрапаліт Мінска-Магілёўскі арцыбіскуп Тадэвуш Кандрусевіч.
Сучасная гісторыя парафіі Божага Цела пачалася ў маі 2005 года. 7 ліпеня адбылася дзяржаўная рэгістрацыя парафіі ў пасёлку Беразінскае. Багаслужэнні праходзілі ў падвале трохпавярховага дома па вуліцы Кастрычніцкай. У 2009 годзе пачалося будаўніцтва будынку касцёла. Узвядзенне сценаў і даху было завершана ў 2011 годзе. Цалкам будаўніцтва касцёла завяршылася летам гэтага года. Напярэдадні ўрачыстасці была добраўпарадкаваная тэрыторыя каля касцёла.
31 жніўня ў Беразінскае з’ехаліся госці са шматлікіх парафій Беларусі, а таксама з Польшчы, Літвы, Канады. Прыехалі прадстаўнікі райвыканкама і райсавета Маладзечанскага раёна, Гарадзілаўскага сельсавета. Прадстаўнікі праваслаўнай і пратэстанцкай царкваў. Вернікі ўсіх хрысціянскіх канфесій.
Распачалася ўрачыстасць з сустрэчы мітрапаліта Мінска-Магілёўскага арцыбіскупа Тадэвуша Кандрусевіча і святочнага ўвахода ў будынак касцёла. Словы прывітання і падзякі сказаў старшыня Маладзечанскага райвыканкама Аляксандр Яхнавец. Ён уручыў арцыбіскупу Тадэвушу Кандрусевічу і пробашчу парафіі айцу Сяргею Бараўнёву кветкі і падарункі.
Затым распачалася Святочная імша, на якой арцыбіскуп Тадэвуш Кандрусевіч асвяціў алтар, а дэкан Маладзечанскага дэканата ксёндз-пралат Эдмунд Даўгіловіч-Навіцкі асвяціў сцены новага касцёла.
“Грамадству патрэбен добры чалавек, выхаваны на хрысціянскіх традыцыях. Бо веруючы чалавек – гэта не толькі член касцёла, гэта таксама і член нашага грамадства. І грамадства будзе такім, якім будзе чалавек. А касцёл выхоўвае чалавека, каб ён любіў Бога, любіў бліжняга, быў міласэрны”, – падкрэсліў арцыбіскуп Тадэвуш Кандрусевіч.
Пасля заканчэння святочнай імшы перад касцёлам адбыўся канцэрт духоўных спеваў, падрыхтаваны каталіцкімі і пратэстанцкімі вернікамі.
Валерый ТРАЦЯК
Фота аўтара
Читайте также
