Выйшла чарговая кніга вершаў смаргонскага паэта Мар’яна Дуксы “Птушка вечнасці – душа”
Зборнік выдадзены ў серыі “Бібліятэка Саюза пісьменнікаў Беларусі” ў выдавецтве “Чатыры чвэрці”.
Пра гэта 5 верасня паведамляе сайт "Залеская Талака".
Многія творы з новай кнігі друкаваліся ў літаратурных часопісах і альманахах. Пераважная большасць вершаў напісана напрыканцы мінулага стагоддзя і напачатку так званых нулявых. Але, напісаныя ва ўласцівай Мар’яну Дуксе манеры глыбокіх філасофскіх разважанняў, яны застаюцца актуальнымі, а з цягам часу яшчэ больш набываюць каштоўнасці, дзякуючы трываласці выкладзеных аўтарам маральных прынцыпаў і эстэтыцы вершаванага радка.
Асабісты вопыт спасціжэння Бога і занепакоенасць лёсам народа, Айчыны, заклапочанасць будучыняй роднай мовы і выкрутастым лёсам нацыянальнай культуры, матывы расчараванняў і ўсёперамагаючая любоў да чалавека – вось асноўныя лейтматывы большасці вершаў.
Яшчэ ў зборніку шмат разважанняў аўтара пра месца паэзіі і паэта ў сучасным свеце. І тут майстар слова застаецца верным сабе і сваім перакананням. Сваёй творчасцю ён упарта сцвярджае, што вершы – не легкадумная пацеха на вясёлай вечарынцы. Паэзія, як сястра філасофіі, павінна вучыць жыццю па самых высокіх мерках чалавечай адказнасці, быць паходняй, што асвятляе дарогу праз змрок, быць духоўнай ежай, што сілкуе розум маладым і надае душэўнай раўнавагі сталым.
Паводле сайта "Залеская Талака"
Читайте также
