Капліца Смаргонскага раёна набыла статус гісторыка-культурнай каштоўнасці. Помніку архітэктуры – амаль 200 гадоў
Рашэннем Гродзенскага абласнога выканаўчага камітэту, капліцы з вескі Дабраўляны 1826 года, нададзены статус гісторыка-культурнай каштоўнасці катэгорыі «3».
Як паведамляе «Светлы шлях», капліца знаходзіцца ў Дабраўлянах і належыць да былога палацава-сядзібнага комплексу Гюнтэраў. Сядзіба Гюнтэраў у свой час з’яўлялася цэнтрам высокай культуры і духоўнасці.
– Сёння засталіся толькі парк, некаторыя гаспадарчыя пабудовы і 2 капліцы, – зазначыла Наталля Чудакоўская. – Прыдарожная капліца 1826 года адлюстравана на літаграфіі беларускага графіка і жывапісца Казіміра Бахматовіча. Ён у 1835 годзе выканаў цыкл літаграфій «Дабраўлянскі сувенір», які складаецца з 10 лістоў з выявай парка і палаца Гюнтэраў. Гэта была своеасаблівая мастакоўская падзяка роднай зямлі. Менавіта ў гэты цыкл і ўвайшла літаграфія прыдарожнай капліцы. Яна захавалася ў першапачатковым выглядзе да нашых дзён.
Капліца – аўтэнтычны помнік архітэктуры ў стылі класіцызму. Статус гісторыка-культурнай каштоўнасці катэгорыі «3» азначае «каштоўнасць рэгіянальнага значэння».
Галіна АНТОНАВА
Фота з сайта shliah.by
Читайте также
