Выхаванцы Смаргонскай школы мастацтваў прывезлі з міжнароднага конкурсу дзве ўзнагароды (фота)
Чарговы Міжнародны конкурс музычна-мастацкай творчасці “New style” праходзіў на сцэне рэспубліканскага Палаца прафсаюзаў.
Лаўрэатам III ступені ў намінацыі “Інструментальная творчасць” стаў вучань Жанны Цялегі Марк Каспяровіч, які выканаў творы Пракоф’ева і Эфрэда. За арыгінальнасць і артыстызм Марк атрымаў яшчэ і спецыяльны падарунак ад журы конкурсу, паведамляе 3 лістапада сайт газеты "Светлы шлях".
Марк Каспяровіч
Жанна Цялега адзначыла, што гэты конкурс быў другім для яе вучня. Крыху раней яго заахвоцілі ганаровай граматай удзельніка лідскага “ЛьВёнка”.
У намінацыі “Вакальная творчасць” дыпломам І ступені ўзнагароджана выхаванка Таццяны Елізаравай Надзея Шчэрбачэвіч. “Песня – гэта птушка” на музыку беларускага кампазітара Алега Елісеенкава ў выкананні Надзеі мела поспех.
Выхаванка Таццяны Елізаравай Надзея Шчэрбачэвіч
Старшынёй конкурснай камісіі быў кампазітар Эдуард Ханок.
Як адзначыла выкладчыца спеваў Смаргонскай школы мастацтваў імя М.-К. Агінскага Таццяна Елізарава, падобныя конкурсы спрыяюць творчым кантактам дзяцей і моладзі, умацаванню сяброўскіх стасункаў у галіне культурнага абмену, павышэнню кваліфікацыі настаўнікаў, а галоўнае – выяўленню таленавітых выканаўцаў. Конкурс – цудоўная магчымасць праявіць эмоцыі адораным юнакам і дзяўчынкам, а таксама назапасіць вопыт сцэнічных выступленняў.
Читайте также
