Сямейны этнаграфічны летнік працуе ў Маладзечанскім раёне
Яго арганізатары – сябры сямейнага этнаграфічнага клуба Студэнцкага этнаграфічнага таварыства. Удзельнікі – сем'і з дзецьмі-дашкольнікамі.
Пра гэта парталу Край.бай расказала адна з арганізатарак Аксана Акуневіч.
Летнік для сем'яў з з дзеткамі-дашкалятамі праходзіць з 25 ліпеня па 6 жніўня ў вёсцы Мойсічы.
Яго ўдзельнікі пазнаёмяцца з традыцыйным вясковым побытам, могуць навучыцца жаць і касіць. Запланаваны таксама шэраг лекцый і майстар-класаў:
27 ліпеня – дзіцячае адзенне (лекцыя і майстар-клас па кроі кашулі),
28 ліпеня – драўляная цацка,
29 ліпеня – вандроўка ў лес або па вёсцы, увечары – традыцыйныя спевы (восеньскія і жніўныя песні),
30 ліпеня – калыханкі і забаўлянкі. Вядзе майстар-клас Ірына Мазюк,
31 ліпеня – выцінанка. Майстар-клас будзе весці Наталля Сухая,
1 жніўня – традыцыйная лялька з саломы. Майстар-клас ад Ірыны Чырвонцавай,
2 жніўня – выпяканне хлеба, увечары – спевы,
3 жніўня – гліняныя цацкі. Будзе працаваць кірмашык,
4 жніўня – лекцыя пра жніво і традыцыйныя абрадавыя лялькі. Спевы,
5 жніўня – кірмаш. Закрыццё летніка.
Па словах Аксаны Акуневіч, на сёння, 26 ліпеня, ужо прыехалі чатыры сям'і. Яшчэ дзве планавалі далучыцца пазней, увечары. «Сёння ўвечары ў нашым летніку будзе васьмёра дарослых і 14 дзяцей узростам да чатырох гадоў. Заўтра прыедуць яшчэ сем'і. Некаторыя мясцовыя далучаюцца да нас на адзін-два дні, некаторыя прыходзяць на асобныя майстар-класы», – расказала яна.
Удзел у летніку платны. Сем'і жывуць у намётах. Па словах Аксаны Акуневіч, можна наведваць асобныя майстар-класы. Але свой удзел неабходна спачатку абмеркаваць с арганізатарамі. Тым больш што ў праграме магчымыя змены.
Дадатковую інфармацыю можна атрымаць па тэлефоне +375 (29) 702-69-19 (Аксана).
Святлана ЦІШКО
Читайте также
