У Астравецкім раёне з’явілася памежная застава Маладзечанская
У населеным пункце Жарнэлі Астравецкага раёна пачала працаваць новая мабільная памежная застава пад назвай Маладзечанская.
Маладзечанскі раённы выканаўчы камітэт і Смаргонская пагранічная група, кіруючыся даручэннем прэзідэнта Рэспублікі Беларусь ад 27 студзеня 2014 года аб прысваенні створанай у населеным пункце Жарнэлі Астравецкага раёна пагранічнай заставе наймення Маладзечанскай, 6 жніўня падпісалі дамову аб эканамічным і сацыяльна-культурным супрацоўніцтве. Аб гэтым 14 жніўня піша “Маладзечанская газета”.
16 ліпеня ў Смаргонскай пагранічнай групе да выканання задач па ахове дзяржаўнай мяжы ў Астравецкім раёне прыступілі дзве новыя мабільныя памежныя заставы.
Ужо ў наступным годзе распачнецца стварэнне іх інфраструктуры паблізу населеных пунктаў Буйкі і Жарнэлі, да 2017 года плануецца цалкам абсталяваць сучасны комплекс аховы. Пакуль жа ў гэтым напрамку пагранічнікі нясуць службу на часовых памежных пастах.
За няпоўны месяц існавання часовых памежных пастоў у зоне іх адказнасці затрымана 46 парушальнікаў памежнага заканадаўства, у тым ліку 17 парушальнікаў мяжы, 29 парушальнікаў пагранічнага рэжыму. Гэта ў асноўным нелегальныя мігранты з краін Паўднёва-Усходняй Азіі (грамадзяне В’етнама), а таксама грамадзяне Грузіі, Пакістана, Кіргізіі.
Уладкаванне пастоў працягваецца.
Пры ўвядзенні ў дзеянне памежнай заставы Маладзечанскай яна будзе абсталявана сучаснымі сродкамі аховы Дзяржаўнай мяжы, тут будуць створаны неабходныя сацыяльна-бытавыя ўмовы.
Паводле “Маладзечанскай газеты”
Читайте также
