“Чытанка для маленькіх” з каляровымі малюнкамі выйшла ў выдавецтве “Кнігазбор”
Новая кніга папоўніла серыю “Каляровы ровар”, што выходзіць у Бібліятэцы Саюза беларускіх пісьменнікаў “Кнігарня пісьменніка”.
Пра гэта Край.бай паведаміў інфармацыйны цэнтр Міжнароднага грамадскага аб'яднання "Згуртаванне беларусаў свету "Бацькаўшчына".
У кнігу ўвайшлі творы з першай часткі “Чытанкі для дзіцячага садка”, укладзенай Вінцуком Вячоркам і Пятром Садоўскім, што была выдадзеная ў 2008 годзе.
“Чытанка для маленькіх” выйшла ў выдавецтве “Кнігазбор” на замову МГА “ЗБС “Бацькаўшчына”. Яна змяшчае вершы і казкі, калыханкі і гульнёвыя прыпеўкі для дзетак да трох гадоў. Творы ў чытанцы сабраныя як народныя, так і аўтарскія.
Дзеткі могуць смела гартаць гэтую кніжку, бо яна ў цвёрдай вокладцы, а старонкі надрукаваныя на шчыльнай паперы. Выданне аздобленае малюнкамі мастачкі Святланы Каньковай-Дударэнкі.
У хуткім часе “Чытанку для маленькіх” можна будзе набыць у кнігарнях Мінска і іншых гарадоў Беларусі.
Святлана ЦІШКО па матэрыялах інфармацыйнага цэнтра МГА “ЗБС “Бацькаўшчына”
Нашли ошибку в тексте? Выделите ее и нажмите Ctrl + Enter
Читайте также
