Браслаўчане выступілі на гала-канцэрце ў Віцебску
Маштабным гала-канцэртам на сцэне Летняга амфітэатра ў Віцебску завяршыўся агляд самадзейнасці творчых калектываў вобласці, у якім прынялі ўдзел і артысты з Браслава.
Калектыў "Брава" выступаў там у вялікім зводным ансамблі барабаншчыц вобласці і выконваў "Марш" на музыку Г. Свірыдава. Арганізатары ўсклалі на іх ганаровую місію – адкрыццё і закрыццё канцэрта. Для таго, каб выступіць у зводным хоры, дзяўчатам, якія яшчэ вучацца ў школе № 1 і гімназіі, давялося рэпеціраваць некалькі тыдняў у Браславе і пару гадзін перад выступленнем у Віцебску. Аб гэтым 6 чэрвеня паведамляе сайт газеты "Браслаўская звязда".
Народны тэатр Браслаўскага РЦК выступаў на гала-канцэрце з тэатралізаванай пастаноўкай "Памяць, застылая ў вяках". Браслаўчане ўжо бачылі яе пад час урачыстых мерапрыемстваў, прысвечаных святам Перамогі і Дню Незалежнасці. Праўда, не ў такім маштабе.
На віцебскай сцэне ўдзел у пастаноўцы прынялі 23 чалавекі з розных арганізацый і ўстаноў горада. Самым малодшым артыстам было па 10 гадоў. Тэатр паказаў больш за 10 розных помнікаў Беларусі і блізкага замежжа, для чаго ўдзельнікам прыйшлося грыміравацца больш за дзве гадзіны.
Аналагічныя гала-канцэрты пройдуць ва ўсіх абласцях Беларусі. Лепшыя нумары з іх будуць адабраны для ўдзелу ў культурных мерапрыемствах рэспубліканскага ўзроўню.
Па матэрыялах сайта газеты "Браслаўская звязда"
Читайте также
