100 ручнікоў прадстаўлена на выставе ў браслаўскім музеі (ФОТА)
4 кастрычніка ў Музеі традыцыйнай культуры адбылося адкрыццё выставы ручнікоў агульнай колькасцю амаль у 100 экспанатаў.
Выстава ручнікоў у Музеі традыцыйнай культуры
Надзвычай розныя па прызначэнню і відах ручнікі з’яўляюцца калекцыяй музейнага аб’яднання. Наведвальніку прапанавалі пазнаёміцца з прыкладамі розных тэхнік, паведамляюць "Весткі". Край.бай анансаваў адкрыццё выставы.
Эла Зінкевіч распавядае аб значэнні ручніка ў жыцці беларусаў
Ручнік – прадмет не толькі ўтылітарнага прызначэння. Ён меў сакральны сэнс і суправаджаў чалавека ўсё жыццё: ад нараджэння і хрэсьбін да апошняга шляху.
Экспазіцыя
Прыклад аздаблення чырвонага кута можна пабачыць на выставе
Злучанасць гэтай рэчы з абразамі, з чырвоным кутом адлюстравана ў лакальных назвах: “набразнік”, “абразны ручнік”, “накутнік”, “багавік”, “завеска”, “плат”, “платок”, “набожны платок”.
У залежнасці ад прызначэння і функцыі ручнікі маюць розныя назвы. Ручнікі ўтылітарныя паўсюдна на Беларусі называюцца “уціральнік”, “уцірач”, “уцірка”, а таксама – “трапкач”, “скарач”, “брэндзал”, “патрэпнічак, “надзёжнік”;
Ручнікі ў залежнасці ад прызначэння адзаблялі карункамі, стужкамі, махрой. Па вышыванаму ручніку шмат чаго можна было прачытаць, аздабляўся ён геаметрычным і раслінным арнаментам, часта ініцыяламі.
Часалі лён у некалькі этапаў. На апошняй стадыі выкарыстоўвалі для часання адмысловыя пэндзлікі са свіной шчаціны, якую стрыглі ў свіней за вушамі.
Дэманстрацыя часання льну
Можна было сустрэць на выставе і так званыя брокаўкі – ручнікі, якія не маюць нічога агульнага з традыцыйным беларускім ручніком. Калісьці ў Расійскай імперыі была распаўсюджана прадукцыя фірмы Генры Брокара (дарэчы, да яе адносіцца парфюм “Чырвоная Масква”), якая спецыялізавалася на вырабе мыла, а ў кожную скрыначку ўкладвалася адмысловая схема для вышыўкі.
Ручнік "брокаўка"
Ручнікі, кросны, прыстасаванні для апрацоўкі льну і воўны часта можна сустрэць у розных вопісах маёмасці.
Вопіс маёмасці жыхара Опсаўскай воласці. 1915 год
Экспазіцыю дапаўняюць кросны – ткацкі стан, на якім і ткалі ручнікі. Супрацоўніцы музея абяцаюць выткаць на іх вясельны ручнік.
Кросны
Выстава будзе працаваць на працягу двух месяцаў у Музеі традыцыйнай культуры ў Браславе.
Паводле Вестак
Читайте также
