Сябры Таварыства аховы помнікаў упарадкавалі месца пахавання паўстанцаў Каліноўскага на Вілейшчыне (ФОТА)
Магілы былі разрабаваныя яшчэ ў савецкі час.
Аб гэтым Краю распавёў старшыня вілейскай суполкі Таварыства аховы помнікаў гісторыі і культуры Дзяніс Канецкі.
6 кастрычніка ўдзельнікі суполкі прыбралі месца пахавання паўстанцаў у капліцы-пахавальні Козел-Паклеўскіх, што ў вёсцы Вялікая Сэрвач.
“Увесну ў склепе ля капліцы мы заўважылі разламаныя труны пахаванцаў і раскіданыя косці. Як стала вядома, магілы слыннага шляхецкага роду ў пошуках каштоўнасцей злодзеі разрабавалі яшчэ ў савецкія часы. Яны вырвалі краты з акенца ў капліцы, залезлі ў склеп і разбілі труны”, – расказаў Дзяніс Канецкі.
Удзельнікі акцыі ўпарадкавалі тэрыторыю вакол капліцы, замуравалі цэглай акенца, склалі косці ў труны. Акрамя таго, сябры суполкі дамовіліся з пробашчам Касцяневіцкага касцёла, што на Дзяды ў капліцы адбудзецца набажэнства.
Сябры Таварыства аховы помнікаў прыбралі тэрыторыю вакол капліцы
Акцыя адбылася ў межах падрыхтоўкі да святкавання 150-годдзя паўстання 1863 года.
Даведка: Вінцэнт Козел-Паклеўскі быў адным з кіраўнікоў паўстанцаў у Вілейскім павеце. Разам са сваім малодшым братам Міхалам загінуў у баі каля вёскі Уладыкі. Іх старэйшы брат Ян быў паплечнікам Кастуся Каліноўскага.
Назва роду пайшла ад назвы маёнтка Паклева ў Ашмянскім павеце.
Герб роду Козел-Паклеўскіх
Юлія ЛАХВІЧ паводле прес-рэлізу Таварыства аховы помнікаў
Фота прадастаўлена Край.бай Дзянісам КАНЕЦКІМ
Читайте также
