Акадэмік Радзім Гарэцкі сустрэўся з маладзечанцамі і падзяліўся з імі сваімі думкамі пра сучасную навуку (ФОТА)
Сустрэча з беларускім геолагам і публіцыстам Радзімам Гарэцкім прайшла 23 кастрычніка ў бібліятэцы «Верасок».
Партал Край.бай анансаваў мерапрыемства.
Як піша «Маладзечанская газета», спадар Гарэцкі адметны не толькі сваёй навуковай і грамадскай дзейнасцю. Ён – пляменнік вядомага беларускага пісьменніка Максіма Гарэцкага. Шмат літаратуразнаўцаў ужо даўно назвалі апошняга «пачынальнікам беларускай прозы» і адвялі заслужанае месца ў шэрагу лепшых творчых асоб Беларусі.
Радзім Гарэцкі расказаў пра жыццё вядомага сваяка, яго літаратурную дзейнасць.
Прыгадаў імя свайго бацькі, Гаўрылы Гарэцкага, аднаго з заснавальнікаў Беларускай акадэміі навук.
– Акадэмія і я – дзеці аднаго чалавека, якія яшчэ і нарадзіліся ў адзін год – у 1928. Таму я асабліва перажываю за сучасную навуку, у прыватнасці за геалогію, якой займаліся мой бацька і дзядзька, якой займаюся і я, – падкрэсліў Радзім Гарэцкі.
У час сустрэчы жадаючыя задавалі пытанні спадару Гарэцкаму. Аўтары самых цікавых атрымалі падарункі.
– Беларуская культура – фактар, які яднае і развівае нас. Але культура – гэта не толькі літаратура ці выяўленчае мастацтва. Гэта больш шырокае кола з’яў, – адзначыла Алеся Башарымава, вядучая вечарыны і прэс-сакратар згуртавання беларусаў свету «Бацькаўшчына».
Мерапрыемства зладзілі пры падтрымцы грамадскай культурніцкай арганізацыі «Будзьма беларусамі» і Міжнароднага грамадскага аб'яднання «Згуртаванне беларусаў свету «Бацькаўшчына», прэзідэнтам якой з'яўляецца Радзім Гарэцкі.
Паводле «Маладзечанскай газеты»
Читайте также
