Не спалохаліся дажджу. Больш за 2500 пілігрымаў пешкі і на роварах прыбылі ў Будслаў на фэст

Партал kraj.by анансаваў гэтую падзею.

Паломнікі прыбывалі ў мястэчка з розных куткоў Беларусі.

Рэкардсменамі па колькасці пройдзеных кіламетраў сталі пілігрымы з Брэста, якія ў складзе пілігрымкі Брэст-Баранавічы-Будслаў за 16 дзён пераадолелі 537 кіламетраў, піша Catholic.by.

Дождж, які ішоў у Будславе амаль увесь дзень, прымусіў перанесці запланаваную для пілігрымаў Імшу з вуліцы ў сцены санктуарыя.

Традыцыйная працэсія прайшла познім вечарам – таксама пад дажджом. Тысячы людзей з засяроджанымі ў малітве тварамі, падсветленымі дрыготкімі агеньчыкамі свечак.

Пасля працэсіі цэлебрацыю Эўхарыстыі апоўначы ўзначаліў арцыбіскуп Тадэвуш Кандрусевіч, мітрапаліт Мінска-Магілёўскі. 

«Касцёл у Беларусі як частка паўсюднага Касцёла заклапочаны маральным становішчам сучаснага чалавека і асабліва маладога пакалення і хоча яму дапамагчы. У гэтым пастырскім годзе, прысвечаным моладзі, мы прыходзім да Божай Маці Будслаўскай, каб шукаць паратунку», – акрэсліў тэму сёлетняга фэсту арцыбіскуп.

Звяртаючыся з Нацыянальнага санктуарыя Апякункі Беларусі да ўсіх людзей нашай краіны, арцыбіскуп Кандрусевіч прамовіў: «Нам і нашаму народу, які сёлета адзначае 100-годдзе абвяшчэння Беларускай Народнай Рэспублікі, неабходная духоўная перамена. Распачаць яе неабходна з сябе, не шукаючы вінаватых. Неабходна на шляху шчырага дыялогу шукаць шляхоў вырашэння існуючых праблем нашага грамадства. Не кампрамісу, а дыялогу, бо, калі кампраміс мае на мэце атрымаць «большы кавалак торта», то мэта дыялогу – дасягненне супольнага дабра».

У цэлебрацыі начной св. Імшы удзельнічаў таксама прадстаўнік папы Францішка ў Беларусі Апостальскі Нунцый арцыбіскуп Габар Пінтэр. Ён прывітаў усіх прысутных на будслаўскай урачыстасці і ўзнёс малітву праз заступніцтва Багародзіцы, у якой даручыў Богу Касцёл і ўвесь народ Беларусі.