Мядзел успамінаў Максіма Танка выставамі, спевамі і дзіцячымі малюнкамі (ФОТА)
15 верасня ў Мядзеле адбылося Рэспубліканскае свята паэзіі і песні “Я сэрцам пісаў сваю кожную песню…”, прысвечанае 100-годдзю з дня нараджэння народнага паэта Беларусі Максіма Танка.
У свяце прынялі ўдзел шматлікія паэты, пісьменнікі, літаратары. Напрыклад — Віктар Шніп, Мікола Мятліцкі, Мікола Шабовіч, Анатоль Бутэвіч, Генадзь Пашкоў.
Пасля ўскладання кветак да магілы Максіма Танка ў вёсцы Новікі ў Мядзеле адкрылі памятны знак у гонар 100-годдзя з дня нараджэння паэта.
У цэнтральнай раённай бібліятэцы імя Максіма Танка адкрылі выставу па выніках Міжнароднага фотапленэра “Дарогамі Максіма Танка”. У Мядзельскім ГДК адбылася сустрэча з творчай групай хранікальна-дакументальнага фільма “Максім Танк”. Выстава, прысвечаная паэту, прайшла ў Мядзельскім музеі Народнай славы. Там жа адбылася прэзентацыя кнігі “Усё жыццё я не любіў расстанняў”.
На вуліцах выступалі фальклорныя калектывы, а дзеці малявалі карціны па творчасці Максіма Танка. Прадставілі сваю прадукцыю народныя майстры з Мядзельшчыны, Пастаўшчыны, Мінскай вобласці. Можна было набыць кнігі, паслухаць паэтаў і пісьменнікаў.
У амфітэатры на беразе возера Мястра адбылося свята паэзіі і песні “Я сэрцам пісаў сваю кожную песню…”. Адкрыў яго міністр культуры Беларусі Павел Латушка. Са сцэны гучалі вершы Максіма Танка, песні на яго радкі. У свяце, апроч прадстаўнікоў улады і пісьменнікаў, прынялі ўдзел спевакі Надзея Мікуліч, Алег Сямёнаў, Дзмітрый Качароўскі, ансамблі “Грамніцы”, “Свята”. Нямала завітала вядомых землякоў Максіма Танка – народная артыстка Беларусі Марыя Захарэвіч, народны мастак Беларусі Васіль Шаранговіч, паэты Мікола Шабовіч, Рагнед Малахоўскі і іншыя.
Віктар РУДЗІН
Читайте также
