Арганізатары свята "Фэст на Дзядку" на Глыбоччыне плануюць асвяціць крыж “Захавальнік лесу" і правесці канкур (ПРАГРАМА)
Сёмы кіламетр дарогі з Пятроўшчыны на Капыльшчыну стане месцам правядзення 6 верасня свята "Фэст на Дзядку".
У гэтым месцы існуе традыцыя ўшаноўваць працу вяскоўцаў, адзначае сайт "Весніка Глыбоччыны".
Раней на мерапрыемства запрашалі 9 жніўня, аднак, як пішуць Весткі, "Фэст на Дзядку" перанесены папярэдне на 6 верасня. Прычына пераносу – забарона наведваць лясы ў сувязі з пажаранебяспечнай абстаноўкай.
Як патлумачыла Край.бай дырэктар цэнтра традыцыйнай культуры і народнай творчасці Алена Заяц, назва фэсту звязаная з імем міфічнага персанажа Дзядка, Дзедкі – старога, які збірае лекавыя расліны. Сустрэць яго, паводле народных павер'яў, можна ў лесе. Дзядок – станоўчы персанаж беларускай міфалогіі, прыносіць людзям дабро.
Як піша “Веснік Глыбоччыны”, да сустрэчы з удзельнікамі свята рыхтуюцца адкрытыя акцыянерныя таварыствы “Залатая падкова”, “Глыбоцкая птушкафабрыка”, Узрэцкі і Залескі сельвыканкамы: лепшых працаўнікоў і жыхароў вёсак адзначаць падарункамі. Плануецца асвячэнне крыжа “Захавальнік лесу”.
Калектывы горада і раёна – народны тэатр фальклору “Цярэшка”, народны ансамбль народнай песні “Крынічанька” Глыбоцкага ГДК, фальклорны калектыў “Прасніца” Запрудскага дома фальклору, фальклорны калектыў “Суседзі” Пятроўшчынскага сельскага дома культуры – прадставяць канцэртныя нумары.
Завітаюць на свята і майстры з раённага Дома рамёстваў са сваімі вырабамі. Будзе арганізаваны гандаль і ў летніх кафэ.
Абяцаюць таксама і канкур – відовішчны від коннага спорту.
Сёлета тэма свята – "Край мой родны, край гасцінны".
Праграма свята “Край мой родны, край гасцінны”:
13.00-13.30 – урачыстае адкрыццё
13.30-15.00 – канцэртная праграма (узнагароджванне)
15.00-16.00 – канкур (таталізатар)
16.00-17.00 – аўкцыён, спартыўна-забаўляльная праграма
13.00-17.00 – выстава-продаж вырабаў народных майстроў, фотавыстава.
Святлана ЦІШКО і паводле Вестак, “Весніка Глыбоччыны”
Читайте также
