«Нібы бездапаможнае дзіця» – на возеры ў Глыбокім выратавалі лебедзя і ўзялі яго дамоў на зімоўку
Лебедзь плаваў пад мастом на возеры Вялікім. Мароз і адсутнасць корму маглі загубіць птушку.
9 снежня супрацоўнікі раённага аддзела па надзвычайных сітуацыях па звароту глыбачан выехалі на вуліцу Вольную, дзе пад мастом плаваў лебедзь, піша «Веснік Глыбоччыны».
У ходзе выратавальнай аперацыі дапамогу птушцы аказаў начальнік караула РАНС Філіп Прадзед, які дзяжурыў у той дзень.
– Вылавіўшы лебедзя з ледзяной вады, нібы бездапаможнае дзіця, ён закутаў яго ў плед і вынес на бераг. Мы ўдзячны глыбачанам за іх нераўнадушныя адносіны да братоў нашых меншых і добрыя сэрцы, напоўненыя спагадай і любоўю да жывой прыроды, – паведамілі ў Глыбокскім РАНС.
Для лебедзя добрыя навіны не скончыліся. Жыхарка Глыбокага – Аляксандра Канстанцінаўна, з вуліцы Вольнай, 9, не толькі на словах пашкадавала птушку, але і ўзяла яе дамоў на зімоўку.
У выпадку, калі дзікім птушкам ці звярам сапраўды пагражае небяспека альбо яны становяцца пагрозай для людзей, тэлефануйце ў раённы аддзел па надзвычайных сітуацыях ці ў раённы аддзел міліцыі, – сказаў начальнік раённай інспекцыі прыродных рэсурсаў і аховы навакольнага асяроддзя Аляксандр Казак.
Галіна Сутула
Фатаграфіі з сайта vg-gazeta.by
Читайте также
