Глыбоцкая дэлегацыя выступіла на свяце нацыянальных культур у Міёрах
Напрыканцы верасня ў Міёрах прайшло абласное свята нацыянальных культур, беларускай кухні і гульні “Нас з’яднала зямля Беларусі”.
Мерапрыемства стала адборачным турам Х Рэспубліканскага фестывалю нацыянальных культур, які адбудзецца ў Гродне, як паведамляе 3 кастрычніка “Веснік Глыбоччыны”.
На свята завіталі прадстаўнікі шматлікіх нацыянальнасцей: рускія, украінцы, яўрэі, латышы, палякі, татары, таджыкі, казахі, армяне, балгары, азербайджанцы, цыгане, якія жывуць побач з беларусамі на зямлі Прыдзвіння.
Багата сабралася і жыхароў з усёй Віцебшчыны. Па традыцыі фестываль распачаўся гульнёвай праграмай і выставай дэкаратыўна-прыкладной творчасці і нацыянальных кухань “Фарбы восені”. Апоўдні на сцэнічнай пляцоўцы на Паўвостраве, улюбёным месцы адпачынку жыхароў Міёраў, запанавала музыка, танцы, песня: перад гасцямі свята выступілі мастацкія калектывы і самадзейныя артысты з усёй вобласці.
– Нашы “Кумачкі” (клуб аматараў нацыянальнай кухні з Гатаўшчыны) прывабілі да сябе ці не ўсіх аматараў салодкага: вішнёвыя торты, пірожныя, вішні ў шакаладзе проста зачароўвалі сваім выглядам дзятву, якая заўсёды “круцілася” ля нашага падворка, – згадвае фестывальны дзень метадыст раённага арганізацыйна-метадычнага цэнтра аддзела ідэалагічнай работы, культуры і па справах моладзі Ірына Альхімовіч.
Пад музыку баяніста Дзмітрыя Крывёнка раскупляліся вішнёвыя прысмакі. А глыбоцкая дэлегацыя азнаёмілася з кухнямі іншых нацыянальнасцей.
Паводле “Весніка Глыбоччыны”
Читайте также
