У аграгарадку Таргуны Докшыцкага раёна пустуючы будынак рэканструюць у жылы дом
На ўездзе ў аграгарадок Таргуны знаходзіцца будынак, які доўга не выкарыстоўваўся. Сёлета гэта маёмасць узята ў гаспадарчы абарот.
За сродкі льготнага крэдыту ў суме каля трох мільярдаў рублёў, які ўзяло ААТ “Таргуны”, у будынку праводзіцца рэканструкцыя, паведамляюць “Родныя вытокі”.
Падрадныя работы вядзе будаўнічая брыгада ДКУБП “ПМК № 52”. Рэканструяваны будынак ператворыцца ў жылы дом з васьмю кватэрамі.
Па словах дырэктара сельгаспрадпрыемства Аляксандра Тулоўскага, гэта службовае жыллё, якое будзе прадастаўляцца ў адпаведнасці з чаргой.
– Будуючы кватэры, – сказаў Аляксандр, – мы думаем пра вырашэнне кадравай праблемы, якая не абмінула і нашу гаспадарку. Дастойная зарплата, умовы працы і жыллё – гэта тыя тры моманты, пра якія думае чалавек, калі вырашае: застацца яму вырошчваць хлеб ці ўцячы ў горад.
Рэканструкцыю жылога дома плануецца завяршыць у кастрычніку, а пабудаваныя душавыя кабінкі і лазня на мехдвары ужо ў поўным распараджэнні працаўнікоў.
Да пачатку ўборачнай кампаніі будзе зманціравана новая сушылка КЗС-60 на газавым паліве. Яе магутнасць – 60 тон збожжа ў гадзіну. Касметычны рамонт вядзецца і ў адміністрацыйным будынку ААТ “Таргуны”.
Па матэрыялах “Родных вытокаў”
Читайте также
