На могілках у Свірках Докшыцкага раёна наводзяць парадак

Аб гэтым пішуць “Родныя вытокі”.

1 лістапада Касцёл успамінаў Усіх Святых – вядомых і невядомых, старадаўніх і сучасных. Гэты дзень не з’яўляецца, як многія лічаць, “святам памерлых”. Наадварот, у гэты дзень Касцёл радуецца, што вельмі шмат людзей ужо заслужылі збаўленне і знаходзяцца з Богам у небе.

2 лістапада адзначаўся дзень памінання нябожчыкаў – Дзяды. У гэты дзень прынята наведваць могілкі і маліцца за памерлых. І ў першую чаргу гэтае месца павінна быць чыстым і дагледжаным.

Адным з важнейшых накірункаў дзейнасці сельвыканкамаў з’яўляецца добраўпарадкаванне населеных пунктаў, навядзенне парадку на зямлі. Многае робіцца ў гэтым плане і ў Параф’янаўскім сельсавеце. Хоць часам і не хапае фінансавых сродкаў, усё ж такі ўдаецца ажыццявіць некаторыя задумкі. У многім дзякуючы згуртаванасці вяскоўцаў, іх імкненню падтрымліваць парадак.

– На тэрыторыі нашага сельсавета знаходзіцца шэсць могілак. Сёлета актыўна заняліся іх добраўпарадкаваннем у Свірках, – гаворыць старшыня Параф’янаўскага сельсавета Галіна Азарэвіч. – Правялі два суботнікі, падчас якіх працавала чалавек дваццаць: выграбалі лісце, абкошвалі траву. У спілоўванні вялікай бярозы дапамогу нам аказаў ксёндз Раман Мурзіч. Але самае, бадай, галоўнае, што замест старога драўлянага плота з’явілася новая жалезабетонная агароджа.

І сапраўды, могілкі набылі зусім іншы выгляд (на здымку).

Ідэю набыць і ўстанавіць новую агароджу падалі Генадзій і Галіна Янчак са Свіркоў.
– Могілкі – гэта святое месца, і мы павінны яго шанаваць, – сцвярджае Галіна Азарэвіч. – Таму ўсе, хто разумее гэта, адразу ўключыліся ў справу. На сённяшні дзень дзякуючы добраахвотным ахвяраванням вяскоўцаў сабрана 13 мільёнаў рублёў на 50 праслаў, 38 з іх мужчыны ўжо ўстанавілі.

Справу плануюць завяршыць вясной, калі на могілках будзе ўстаноўлены драўляны крыж, зрабіць які за зіму паабяцаў ксёндз Раман.

Паводле “Родных вытокаў”