15 верасня распачнецца новы сезон бясплатных курсаў “Мова Нанова” ў Маладзечне
Арганізатары анансуюць новыя сустрэчы з пісьменнікамі, вядомымі беларускімі гуртамі і выканаўцамі і наогул цікавымі людзьмі. Заняткі па-ранейшаму будуць праходзіць у бібліятэцы “Верасок” кожны аўторак а 18 гадзіне.
Наш партал пісаў пра першую восеньскую сустрэчу ў межах леташніх курсаў.
Як паведаміла нашаму парталу загадчыца аддзела абслугоўвання і інфармацыі Маладзечанскай цэнтральнай раённай бібліятэкі імя Максіма Багдановіча Таццяна Закрэўская, магчыма, тэмай першай сустрэчы моўных курсаў стане “Бібліятэка”.
– 15 верасня, – зазначыла суразмоўца, – Дзень бібліятэк, таму не выключаем, што тэмай можа стаць і бібліятэка. Акрамя таго, у нашу першую сустрэчу мы плануем падвесці вынікі конкурса “Чытаем па-беларуску!”. Мы ўзнагародзім трох чытачоў, якія за перыяд правядзення конкурса прачыталі кніг больш за астатніх.
Па меркаванні Таццяны Закрэўскай, моўныя курсы за час існавання ў Маладзечне ўжо набылі сваю аўдыторыю.
– Так, аўдыторыя склалася. Да нас прыходзілі і сталыя людзі, і моладзь. Курсы выклікалі цікавасць шмат у каго. Да таго ж, гэта адно з нешматлікіх месцаў, дзе можна пагутарыць па-беларуску адзін з адным.
Як адзначыла загадчыца аддзела, наведвальнікаў курсаў чакаюць вядомыя беларускія выканаўцы і гурты, пісьменнікі і эксперты, і ўвогуле цікавыя людзі.
Пачатак заняткаў у 18.00.
Кацярына СУШКО
Нашли ошибку в тексте? Выделите ее и нажмите Ctrl + Enter
Читайте также
