Слесар Пастаўскага райгаза Павел Марціновіч расказаў, як ён выратаваў жанчыну на пажары
Павел Марціновіч працуе ў РВП “Паставырайгаз” слесарам аварыйнай службы. 19 студзеня, убачыўшы пажар, не толькі патэлефанаваў на “101”, але і кінуўся ў агонь ратаваць жыццё незнаёмага чалавека.
Як паведамляе “Пастаўскі край”,19 студзеня ён разам з жонкай ехаў на дачу ў вёску Баранавічы (Юнькаўскі сельсавет). У Бакавічах убачыў такую карціну: жылы драўляны дом унутры ахапіў пажар (Край.бай пісаў аб гэтым).
Павел Марціновіч
- У хату кінуўся не раздумваючы, - расказваў пазней Павел. - Пакой быў вельмі задымлены, і я не знайшоў там чалавека. Але пачуў стогн, таму вярнуўся на вуліцу, удыхнуў свежага паветра і зноў у агонь. Каля акна ляжала гаспадыня. Відаць, заўважыўшы пажар, яна хацела адчыніць вокны, але страціла прытомнасць. Вынес жанчыну на вуліцу. Падаспелі пажарныя, “хуткая дапамога”. Ці страшна было? У той момант за сваё жыццё не хваляваўся, думаў пра чужое.
А рызыка была вялікая: незнаёмы дом, адсутнасць спецыяльнай падрыхтоўкі, неабароненасць органаў дыхання… На шчасце, Павел не пацярпеў. Гаспадыня дома была дастаўлена ў рэанімацыю. Апёкі - 18% цела, але сёння яе здароўю ўжо нічога не пагражае.
Прычынай пажару сталі запаленыя свечкі ля абраза (трагедыя адбылася на Вадохрышча). Сітуацыю пагоршыла тое, што ў доме не было аўтаномнага пажарнага апавяшчальніка. Дзякуючы яму жанчына, якая знаходзілася ў суседнім пакоі, магла б раней заўважыць агонь, і ён не разгарэўся б з такой сілай.
Дом пашкоджаны толькі знутры - абгарэлі сцены, столь, мэбля. Сіл і сродкаў у рамонт прыйдзецца ўкласці нямала. Але, як сказаў гаспадар (ён на момант пажару знаходзіўся на працы), гэта дробязі, галоўнае - абышлося без ахвяр.
- Выпадкі, калі чалавек рызыкуе ўласным жыццём дзеля выратавання іншых, адзінкавыя, - адзначыў інспектар групы прапаганды і навучання РАНС Аляксандр Мухля. - На жаль, людзі часцей абмяжоўваюцца выклікам пажарнікаў. Учынак Паўла заслугоўвае асаблівай увагі.
Дарэчы, гэта не першая надзвычайная сітуацыя, у якой Павел Марціновіч праявіў сябе. Некалькі гадоў назад ён дапамог патушыць легкавы аўтамабіль, які гарэў па вуліцы Чырвонаармейскай у Паставах. Дзякуючы тром вогнетушыцелям, якія знаходзіліся ў службовай машыне слесара, агонь быў лакалізаваны максімальна хутка.
Па матэрыялах "Пастаўскага краю"
Нашли ошибку в тексте? Выделите ее и нажмите Ctrl + Enter